ئەپیکور بۆ رووداو: هیچ رێککەوتنێک بۆ هەناردەکردنەوەی نەوتی کوردستان نەکراوە

رۆژی چوارشەممە 24ـی کانوونی دووەمی 2024، مایڵز کاگینز، گوتەبێژی کۆمەڵەی پیشەسازیی نەوتی کوردستان، لەبارەی کۆبوونەوە و گفتوگۆی نوێنەرانی کۆمپانیاکانی نەوت لەگەڵ حکومەتی هەرێمی کوردستان و عێراق و بەتایبەتی کۆبوونەوەی ئەمڕۆیان لەگەڵ وەزارەتی سامانە سروشتییەکان، بە تۆڕی میدیایی رووداوی راگەیاند "کۆبوونەوەکە هیچ ئەنجامێکی نەبوو و، زیاتر پەیوەست بوو بەوەی گفتوگۆی زیاتر بکرێت، بۆیە هیچ راگەیێندراوێکیش نەبوو."

 

گوتەبێژی کۆمەڵەی ئەپیکور، ئاماژەی بەوەکرد یەکێک لە گەورەترین بەربەستەکانی بەردەم دەستپێکردنەوەی پرۆسەی هەناردەکردنی نەوتی هەرێمی کوردستان، ئەوەیە کۆمپانیا نێودەوڵەتییەکان تائێستا نازانن چۆن خەرجیی کارەکانیان پێدەدرێت. 

 

مایڵز کاگینز گوتی "کۆمپانیاکان دەبێت بزانن چۆن پارەیان پێدەدرێت. با قسەکانم بخەمە چوارچێوەیەکی دیکەوە؛ ئایا مامۆستایان لە سلێمانی دەزانن چۆن پارە وەردەگرن؟ یان پێشمەرگە دەزانێت چۆن پارە وەردەگرێت؟ باشە کۆمپانیاکان چۆن بزانن؟ لەکاتێکدا ئێمە هاووڵاتی عێراقی یان کورد نین." 

 

لەبارەی گفتوگۆکانی نوێنەرانی ئاپیکور و حکومەتی عێراق، تایبەت بە پرسی هەناردەکردنەوەی نەوتی هەرێمی کوردستان، کاگینز گوتی: "ئێمە هەمیشە پێمانوایە هەموو کۆبوونەوەیەک ئەرێنییە، بەڵام هیچ شتێکی کرداری نییە. هەر کاتێکیش رێککەوتن هەبێت، پێموابێت هەموو لایەک، بەغدا، هەولێر، ئەپیکور رایدەگەیەنن. بۆیە هەموو کۆبوونەوەیەک هەنگاوێکی ئەرینییە، بەڵام هێشتا هیچ رێککەوتنێک نییە رایبگەیەنین. ئێمە لەگەڵ هەموو لایەک کاردەکەین تاوەکو بگەیەنە ئەنجامێکی ئەرێنی."

 

بەڵام نەیشاردەوە کە هێشتا ئاسۆی رێککەوتن دیارنییە و گوتی "گفتوگۆکان لەلایەن بەغداوە سەرپەرشتی دەکرێن و پێموایە ئەوان هیچ ناڵێن لەبەرئەوەی هیچیان پێ نییە، بیڵێن."

 

بەگوێرەی زانیارییەکانی گوتەبێژی کۆمەڵەی پیشەسازیی نەوتی کوردستان، راگرتنی هەناردەکردنی نەوتی هەرێمی کوردستان بۆ تورکیا زیانێکی زۆری بە هەولێر و بەغدا گەیاندووە و کە تائێستا گەیشتووەتە "حەوت ملیار دۆلار."

 

رۆژی 25ـی ئاداری 2023، هەناردەکردنی نەوتی هەرێمی کوردستان بەهۆی بڕیارێکی دادگەی نێوبژیوانیی نێودەوڵەتی لە پاریس راگیرا. 

 

گرووپی ئەپیکور لە شەش کۆمپانیای تایبەت بە نەوت لە هەرێمی کوردستان پێکهاتووە و پێش راگرتنی هەناردەکردنی نەوتی کوردستان بۆ تورکیا، ئەندامانی ئەو کۆمەڵەیە، 50٪ـی نەوتی رۆژانەی هەرێمی کوردستانیان بەرهەمدەهێنا.

 

لە دوای راگرتنی هەناردەکردنی نەوتی هەرێمی کوردستان بۆ بەندەری جەیهان، بەرپرسانی لایەنی پەیوەندیداری عێراق و تورکیا چەند جارێک دانوستاندنیان لەبارەی هەناردەکردنەوەی نەوتی هەرێمی کوردستان کردووە.

 

گوتەکانی مایڵز کاگینز لەکاتێکدایە فوئاد حوسێن، وەزیری دەرەوەی عێراق 17ـی ئەم مانگە لە داڤۆسەوە گوتی "چەند هەفتەیەک پێش ئێستا بە سەرۆکایەتیی شاندێکی باڵای عێراقی چووینە ئەنقەرە و گفتوگۆیەکی باشمان هەبوو، یەکێک لە بابەتە سەرەکییەکانیش کە تاوتوێمان کرد هەناردەکردنەوەی نەوتی هەرێمی کوردستان بۆ بەندەری جەیهان، ئێستا هیچ کێشەیەک لە بەندەر و بۆرییەکەدا نییە، ئەوان ئامادەییان دەربڕیوە دەست بە هەناردە بکەنەوە، بەڵام کێشەکە لەنێوان حکومەتی هەرێمی کوردستان و حکومەتی فیدراڵدایە."

 

د. فوئاد حوسێن باسی رێککەوتنی حکومەتی هەرێمی کوردستان و فیدراڵشی کرد و رایگەیاند "چەند رۆژێک بەر لە ئێستا رێککەوتنێک لەنێوانیان واژۆ کراوە، بەهیواین بەمزوانە دەست بە هەناردەکردنەوەی نەوتی هەرێمی کوردستان بکرێتەوە."