حکومەت بڕیاریدا باج لەسەر چەند شوێنێک رابگرێت

 

رۆژی سێشەممە، 23ـی تەممووزی 2024، حکومەتی هەرێمی کوردستان لە راگەیێندراوێکدا، راگرتنی باجی لەسەر چێشتخانە، هۆتێلەکان، نەخۆشخانە تایبەتەکان، سەموونخانە و نانەواخانەکان راگەیاند.

 

حکومەت دەڵێت، راگرتنی وەرگرتنی باج کە لە یاسای ژمارە (26)ـی ساڵی 1962ـدا هاتووە، تاوەکو یەکلاییکردنەوەی رێکخستنەوەی رێکارەکانی وەرگرتنی باج لە دامودەزگا فیدراڵییەکان و هەمواری یاساکە بەردەوام دەبێت. 

 

کەمال وەرتێ، بەڕێوەبەری گشتیی باج و خانووبەرە لە وەزارەتی دارایی لە کۆنفرانسێکی رۆژنامەڤانیدا گوتی، حکومەتی هەرێمی کوردستان بە رەچاوکردنی دۆخی ئابووری و بە مەبەستی سووککردنی باری سەر شانی پیشەوەران ئەو بڕیارەی دراوە. 

 

یەکێک لە بڕیارەکان، بەگوتەی کەمال وەرتێ، لابردنی رێژەی 10٪ـی باجی فرۆشی سەر چێشتخانە و هۆتێلەکانە. 

 

هەروەها بەگوێرەی بڕیارەکە، 5٪ـی باجی سەر نەخۆشخانە تایبەتەکان رادەگیرێت. کەمال وەرتێ گوتی، دەبوایە ئەو باجە لە پزیشکان و پارەی داهاتی نەشتەرگەرییەکان وەربگیرێت، بەڵام نەخۆشخانەکان باجەکەیان دەخستە سەر نەخۆش. 

 

زیرەک بیا ئیلیا، سەرۆکی کۆمەڵەی میوانخانە و چێشتخانەکان لە هەولێر ئەمڕۆ سێشەممە بە تۆڕی میدیایی رووداوی گوت، بڕیارەکە دڵخۆشیی خاوەن چێشتخانە و میوانخانەکانی لێکەوتووەتەوە و بارگرانییەکی زۆر لەسەر خاوەن چێشتخانە و میوانخانەکان کەم دەکاتەوە. 

 

سەرۆکی کۆمەڵەی میوانخانە و چێشتخانەکان لە هەولێر گوتیشی، چاوەڕێ دەکەن ئەو بڕیارە کاریگەرییەکی گەورەی لەسەر بووژاندنەوەی کاری چێشتخانە و میوانخانەکان هەبێت.