رووداو دیجیتاڵ
وەزارەتی دارایی عێراق دەڵێت، بەپێچەوانەی نووسراوێکی حکومەتی هەرێمی کوردستان، کە دەڵێت داهاتەکانی نانەوتیی دوو مانگی رادەستکردووە، "حکومەتی هەرێمی کوردستان هیچ داهاتێکی نانەوتیی بۆ نەناردووین."
بەپێی نووسراوێک کە وەزارەتی دارایی عێراق رۆژی پێنجشەممە، 9ـی ئەم مانگە لەبارەی داهاتە نانەوتییەکانییەوە ئاراستەی حکومەتی هەرێمی کوردستانی کردووە، هیچ داهاتێکی نانەوتیی هەرێمی کوردستان نەخراوەتە ئەو هەژمارە بانکییەیەوە کە بۆ ئەو مەبەستە کراوەتەوە.
وەزارەتی دارایی ئاماژەی بە نووسراوی ژمارە (6083)ـی حکومەتی هەرێمی کوردستان کردووە، کە رۆژی 8ـی ئەم مانگە نێردراوە و تێیدا حکومەتی هەرێمی کوردستان دەڵێت: 50٪ـی داهاتی دەروازە سنوورییەکان و 50٪ـی داهاتی باجەکان بۆ مانگەکانی شوبات و ئاداری 2024 رادەستکردووە و، دەڵێت "هەرێمی کوردستان بەپێی ئەو نووسراوەی ناردوویەتی ئاماژەی بۆ داهاتە نانەوتییەکانی مانگی کانوونی دووەمی 2024ـی نەکردووە."
وەزارەتی دارایی عێراق لە نووسراوەکەیدا باسی ئەوەی کردووە؛ هەرێمی کوردستان پێشێلی بڕگەی (دال لە خاڵی دووەمی مادەی 12)ـی کردووە، چونکە "سەرجەم داهاتە نانەوتییەکانی نەناردووە."
وەزارەتی دارایی عێراق ئاماژەی بۆ ئەوە کردووە، بەپێی نیشاندەری جوڵەی هەژماری تایبەت بە هەژماری بانکیی 70018 کە بۆ دانانی داهاتە نەوتییەکانی هەرێمی کوردستان لە بانکی ناوەندی تەرخانکراوە، هەژمارەکە باڵانس "رەسید"ـی سفرە و هیچ بڕە پارەیەکی تێدا دانەنراوە.
فارس عیسا، سەرۆکی نوێنەرایەتیی حکومەتی هەرێمی کوردستان، رۆژی دووشەممە، 20ـی ئایاری 2024، بە رۆژنامەی سەباحی فەرمیی عێراقی گوت حکومەتی هەرێمی کوردستان لە کۆبوونەوەی ژمارە 250ـی خۆیدا بڕیاری داوە داهاتە نانەوتییەکانی رادەستی حکومەتی فیدراڵی بکات. ئەوەشی بە هەنگاوی یەکەمی رێگەی چارەسەرکردنی کێشەی دارایی نێوان هەردوو حکومەت ناوبردووە.
مادەی 12ـی یاسای بودجەی گشتی عێراق بۆ ساڵی 2024، حکومەتی هەرێمی کوردستانی بە رادەستکردنی داهاتە نانەوتییەکانی بە عێراق بەپێی یاسای بەڕێوەبردنی دارایی پابەند کردووە، دوای وردبینیکردنیان لەلایەن دیوانی چاودێریی عێراق و هەرێمی کوردستان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ