نرخی نەوت کە زیاتر لە دوو دۆلار بەرزبووەتەوە، بەجێگیری مایەوە

 

هۆکاری بەرزبوونەوەی نرخی نەوت بۆ ئاستی ئێستا بۆ کەمبوونەوەی قەبارەی نەوتی کۆگاکراو لە ئەمریکا دەگەرێتەوە، کە بووەتە هۆکار بۆ پاڵپشتی لە نرخی نەوت.

 

نرخی نەوتی سووکی تەکساسی ئەمریکاش، ئەمڕۆ (پێنجشەممە، 22-6-2023) لە نزیکەی 72 دۆلار مامەڵەی پێوەکرا، لەکاتێکدا رۆژی چوارشەمە نرخی ئەو نەوتە لە 70 دۆلارەوە بەرزبووەوە بۆ 72 دۆلار و 65 سەنت.

 

بەپێی شرۆڤەکاران، بەرزبوونەوەی رۆژی رابردووی نرخی نەوت بەهۆی بەرزبوونەوەی بەرچاوی نرخی گەنمەشامی و سۆیا بووە.

 

گەنمەشامی و سۆیا ئەو بەرهەمانەن کە سووتەمەنی بایۆفیوڵ یان سووتەمەنی گیاییان لێ بەرهەمدێت و بازرگانان دەڵێن بەرزبوونەوەی نرخی ئەو دوو بەرهەمە بۆ بەرزترین ئاستەکانی لە چەند مانگی رابردوو، دەبێتە هۆکار بۆ ئەوەی سووتەمەنی گیایی قەبارەکەی دابەزێت و بەو پێیەش خواست لەسەر سووتەمەنی ئاسایی کە نەوت و بەرهەمە نەوتییەکانە، زیاد دەکات.

 

جیرۆم پاوڵ، سەرۆکی بانکی ناوەندی ئەمریکا رایگەیاندووە تاوەکو کۆتایی ئەمساڵ سوودی بانکی دووبارە بەرزدەکەنەوە و ئەوەش گوشاری لەسەر نرخی نەوت دروستکردووە، بووەتە هۆی ئەوەی بەرزبوونەوەی نرخی نەوت سنووردار بێت.

 

ئەمڕۆ ئامارەکانی پەیوەست بە قەبارەی نەوتی کۆگاکراو لە ئەمریکا بڵاودەبنەوە و پێشبینی دەکرێت کاریگەری لەسەر بازاڕی نەوت دابنێن.