رووداو دیجیتاڵ
ئەندامێکی ئەنجوومەنی کارگێڕی ژووری بازرگانی سلێمانی رایدەگەیێنێت، بەراورد بە چوار مانگی ساڵی رابردوو، ئەم ساڵ ئاستی ئاڵوگۆڕی بازرگانی لەگەڵ ئێران نزیکەی 17٪ زیادیکردووە، بەڵام هاوردەکردنی کاڵا بەشێوەی ترانزێت بە وڵاتی ئێراندا نزیکەی 75٪ کەمیکردووە.
ئەحمەد کەلاری، ئەندامی ئەنجوومەنی کارگێڕیی ژووری بارزگانی و پیشەسازیی سلێمانی میوانی پۆدکاستی بەکاتی سلێمانی بوو لە رادیۆی رووداو کە هەفتانە ئاسۆ سەراوی پێشکێشی دەکات، راگەیاند، ئاستی جوڵە و ئاڵوگۆڕی بازرگانی لەگەڵ کۆماری ئیسلامی ئێران لە ماوەی چوار مانگی سەرەتای ئەم ساڵ بەراورد بە هەمان ماوەی ساڵی رابردوو نزیکەی 17٪ زیادیکردووە.
ئەندامەکەی ئەنجوومەنی کارگێڕی ژووری بازرگانی و پیشەسازی سلێمانی دەڵێت، سەرەڕای ئەوەی جووڵەی بازرگانی لەگەڵ ئێران زیادیکردووە، بەڵام هاوردەکردنی کاڵا بەشێوەی ترانزێت، واتا ئەو کاڵایانەی لە وڵاتانی دیکەوە هاوردە دەکرێن و خاكی ئێران وەکو ترانزێتی گواستنەوە بەکاردەهێنن، بە رێژەیەکی بەرچاو کەمی کردووە، بەتایبەت لە دەروازەی نێودەوڵەتیی باشماخ کە رێژەکەی دەگاتە 75٪.
لەبارەی هۆکاری کەمبوونەوەی ترانزێت، ئەحمەد کەلاری دەڵێت، هۆکاری کەمبوونەوەی باری ترانزێت بۆ ئەوە دەگەڕێتەوە ئەو بازرگانانەی کە کاڵا و شمەک هاوردە دەکەن بەشێوەی ترانزێت ئەوا لە سەکۆی پێدانی دۆلار بە نرخی فەرمی بێبەش دەکرێن، بۆیە بازرگانانیش هاوردەکردنی کاڵایان لەو رێگەیەوە راگرتووە.
گوتیشی، هەر کاڵایەک لە وڵاتی ئێران هاوردە بکرێت یان بەنێو ئەو وڵاتەشدا بەشێوەی ترانزێت هاوردە بکرێت، ئەوا بازرگانەکە لە پێدانی دۆلار بە نرخی فەرمی بێبەش دەبێت.
ماوەی سێ مانگ زیاتر كاڵایەكی زۆری دەیان بازرگانی سلێمانی لە نزیك دەروازەی سەریرانبەن ماوەتەوە، ئێران رێگەنادات ببرێتە ئەو وڵاتە لەکاتێکدا پێشتر بەشێوازی كۆڵبەری دەبرایە ئێران.
ئەندامەکەی ئەنجوومەنی کارگێڕی ژووری بازرگانیی سلێمانی دەڵێت، "لەگەڵ بەرپرسی پەیوەندییە بازرگانییەکانی ئێران لەگەڵ عێراق و هەرێمی کوردستان گرفتەکەمان پێگەیاند، ئەو بەرپرسە پێی گوتین، حکومەتی عێراق و بەدیاریکراوی راوێژکاری ئاسایشی نیشتمانیی عێراق داوایکردووە کە رێگەنەدرێت کاڵا بەشێوەی کۆڵبەری بچێتە ئێران و قەدەخە بکرێت."
لەبارەی هەوڵەکانیان بۆ چارەسەرکردنی ئەو بابەتە، ئاماژەی بەوەکرد، لایەنی ئێرانی بەڵێنی پێداون کە لەگەڵ لایەنی عێراقی قسە بکات بۆ چارەسەرکردنی گرفتەکە.
هەرچەندە ژوورێکی بازرگانی هەیە لەنێوان هەردوو وڵاتدا بەناوی ژووری بازرگانیی ئێران - عێراق، بەڵام تاوەکو ئێستا هیچ نوێنەرێکی هەرێمی کوردستان و ژوورە بازرگانییەکانی هەرێمی کوردستان لەو ژوورەدا ئەندام نین.
ئەحمەد کەلاری گوتی، بەلایەنی ئێرانیمان گوتووە، پێویستە نوێنەری هەرێمی کوردستان لە ژووری بازرگانی عێراق - ئێران هەبێت. لایەنی ئێرانیش هاوڕابوون و پێویستە حکومەتی هەرێمی کوردستانیش لەسەر ئاستی نوێنەرایەتی داوا بکات نوێنەرمان لەو ژوورە هەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ