ئەنگۆلا لە ئۆپێک کشایەوە و نرخی نەوتی زیاتر لە دۆلارێک دابەزاند

رووداو دیجیتاڵ

ئەنگۆلا لە رێکخراوی ئۆپێک کشایەوە و بەوهۆیەوە نرخی نەوت زیاتر لە دۆلارێک دابەزی.

رۆژی پێنجشەممە 21-12-2023، دیامانتینۆ ئازێڤێدۆ، وەزیری نەوتی ئەنگۆلا بە ئاژانسی هەواڵی وڵاتەکەی راگەیاند، ئەنگۆلا لە ئەندامێتیی رێکخراوی وڵاتانی هەناردەکاری نەوت (ئۆپێک) دەکشێتەوە، چونکە ئەندامێتییەکە خزمەت بە بەرژەوەندییەکانی وڵاتەکە ناکات.

ئەنگۆلا لە ساڵی 2007ـدا بووە ئەندامی ئۆپێک و رۆژانە نزیکەی ملیۆنێک و 100 هەزار بەرمیل نەوت بەرهەمدەهێنێت لەکۆی 28 ملیۆن بەرمیلی گرووپەکە.

دوای هەواڵەکە، نرخی نەوت دابەزی و بەرمیلێک نەوتی برێنت زیاتر لە دۆلارێکی نرخەکەی لەدەستدا و بە 78.50 دۆلار مامەڵەی پێوەکرا.

کشانەوەی ئەنگۆلا دەبێتە لەمپەرێکی دیکە لەبەردەم ئۆپێک و هاوپەیمانەکانی لەکاتێکدا هەوڵەکانیان چڕکردووەتەوە بۆ یەکخستنی ئەندامان لە پشتیوانیکردنی نرخی نەوت.

مانگی رابردوو هاوپەیمانیی ئۆپێک پڵەس- کە لە 13 ئەندامی ئۆپێک پڵەس و 10 وڵاتی دیکەی بەرهەمهێنەری نەوتیی دەرەوەی ئۆپێک پێکدێت- رایگەیاند، لە چارەکی یەکەمی ساڵی داهاتوو بەرهەمهێنانی نەوت بە بڕی دوو ملیۆن و 200 هەزار بەرمیل نەوت لە رۆژێکدا کەمدەکەنەوە.

ئازێڤێدۆ ناڕەزایەتیی بەرامبەر بڕیارەکە دەربڕی؛ ئاژانسی بلومبێرگیش لەسەر زاری ئێستێڤۆ پێدرۆ، پارێزگاری ئۆپێکی ئەنگۆلا بڵاویکردەوە، وڵاتەکە دڵخۆش نییە بەو بڕیارە و لەگەڵ ئامانجەکانی لە ساڵی داهاتوو ناگونجێت، بۆیە پێوەی پابەند نابن.

پێشتریش هەر بەهۆی ناکۆکییە ناوخۆییەکانی ئۆپێک پڵەسەوە، کۆبوونەوەی رێکخراوەکە لە 26ـی تشرینی دووەمەوە بۆ 30ـی هەمان مانگ دواخرابوو.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger