رووداو دیجیتاڵ
بانکی نێودەوڵەتی رایگەیاند، ساڵی رابردوو کۆمپانیاکانی نەوت و گاز زۆرترین گازی هاوەڵیان لەماوەی پێنج ساڵدا سووتاندووە کە 148 ملیار مەتر سێجا گاز بووە، نۆ وڵاتیش 75٪ـی کۆی گازی هاوەڵیان سووتاندووە، کە عێراق یەکێکیانە.
بانکی نێودەوڵەتی رایگەیاند، لە ساڵی 2023دا کۆمپانیاکانی نەوت و گاز 7٪ زیاتر لەو گازەیان سووتاندووە کە لەساڵی 2022 سووتێندراوە، هەرچەندە لەو ماوەیەدا تەنیا 1٪ بەرهەمهێنانی نەوت زیادیکردووە.
راگرتنی سووتاندنی گازی هاوەڵ یەکێکە لە ئامانجەکانی بانکەکە کە دایناوە تاوەکو ساڵی 2030 پێیبگات.
بانکی نێودەوڵەتی لە راپۆرتەکەیدا دەڵێت هەوڵەکان بۆ راگرتنی سووتاندنی گازی هاوەڵی نەوت بەردەوام نییە و پێویستە رێکاری زیاتر بگیرێتەبەر، کە راگرتنی سووتاندنەکە دەبێتە هۆی کەمبوونەوەی لانیکەمی 381 ملیۆن تۆنی هاوتا لە دووەم ئۆکسیدی کاربۆن لە گازە زیانبەخشەکانی نێو بەرگە هەوا.
بەپێی راپۆرتەکەی ئەو دامەزراوە نێودەوڵەتییە کە پشتی بە داتای مانگە دەستکردەکان بەستووە، هەریەک لە وڵاتانی بەرهەمهێنەری نەوت (رووسیا، ئێران، عێراق، ئەمریکا، ڤەنزوێلا، جەزائیر، لیبیا، نەیجیریا و مەکسیک) بەرپرسن لە سووتاندنی 75٪ـی گازی هاوەڵ، هەر ئەو وڵاتانە 46٪ـی نەوت بەرهەمدەهێنن.
جەزائیر و ڤەنزوێلا، ئەو دوو وڵاتەن کە بانکەکە دەڵێت سووتاندنی گازی هاوەڵیان کەمکردووەتەوە، بەڵام ئەو دەستکەوتە بەهۆی ئێران و رووسیا و ئەمریکا و لیبیا و وڵاتانی دیکەوە داخوراوە.
بانکی نێودەوڵەتی نیگەرانی خۆی نیشانداوە لەوەی بازدانەکانی ساڵی 2021 و 2022 کە لە کەمکردنەوەی سووتاندنی گاز بەدەستهاتووە، ساڵی 2023 پووکاوەتەوە.
گازی هاوەڵی نەوت، جۆرێکە لە گازی سرووشتی، لە کان و بیرەکانی نەوتدا هەیە، یان لە نەوتەکەدا تواوەتەوە، یان بەشێوەی گۆمەزی گازیی لەسەرووی نەوتی نێو کانەکە دەبێت، هەندێک لە کۆمپانیاکان لەگەڵ نەوتەکەدا سوود لە گازەکەش وەردەگرن یان لەنێو کانەکە دەیهێڵنەوە، هەندێکیش دەیسووتێنن.
عێراق یەکێکە لەو وڵاتانەی زۆرترین گازی هاوەڵ لەسەر ئاستی جیهان دەسووتێنێت، رۆژی 16ـی حوزەیرانی ساڵی 2023، محەممەد شیاع سوودانی، سەرۆکوەزیرانی عێراق رایگەیاند وڵاتەکەیان بەفێڕۆچوونی لە سامانی گاز هەیە و ساڵانە نزیکەی 4 ملیار دۆلار زیان بە عێراق دەگەیێنێت، بۆ ئەوەش عێراق پلانی هەیە تاوەکو ساڵی 2030 ئەو کارە رابگرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ