تایبەت بە رووداو؛ وادەی ناردنی مووچەی مانگی 10 لە بەغداوە

 

رۆژی دووشەممە، 18 تشرینی دووەمی 2024، سەرچاوەیەک لە وەزارەتی دارایی هەرێمی کوردستان بە تۆڕی میدیایی رووداوی راگەیاند: "ئەمڕۆ  خەرجکردنی مووچەی مانگی 10 چووەتە قۆناخی وردبینی، واتا قۆناخی پێش خەرجکردنی پارە."

 

ئەو سەرچاوەیە گوتی: "ئەگەری هەیە سبەی یان دوای پڕۆسەی سەرژمێری یەکەم گوژمەی مووچەی مانگی 10 خەرج بکرێت."

 

لەبارەی رادەستکردنی داهاتی ناوخۆ ئەو سەرچاوەیە گوتی: "داهاتی ناوخۆ و مووچە دوو بابەتی جیاوازن، بەڵام حکومەتی عێراق هەموو مانگێک بیانوویەک دەدۆزێتەوە بۆ ئەوەی مووچە دوابکەوێت، ئەگەر کارەکان تەواوبن سبەی داهاتی ناوخۆ بۆ بەغدا دەنێردرێت."

 

رۆژی 03-11-2024 لیستی مووچەی مانگی 10ی مووچەخۆرانی هەرێمی کوردستان لەلایەن تیمێکی تەکنیکیی وەزارەتی داراییەوە رادەستی وەزارەتی دارایی عێراق کرا، تاوەکو وردبینی تێدا بکرێت.

 

ئەو سەرچاوەیە گوتی: "ئەو وردبینییەی پێشووتر کرابوو ئەلیکترۆنی بوو، بەڵام ئەو وردبینییەی ئێستا چاوەڕوانین تەواو ببێت، وردبینیی ژمێرکارییە."

 

هەرێمى کوردستان مانگانە پێویستى بە 988 ملیار دینارە بۆ مووچەی مووچەخۆران و فەرمانبەرانی هەرێمی کوردستان.