یاریدەدەری ئەردۆغان: ساڵێکی دیکە لەم کاتانەدا باسی هەڵاوسان ناکەین

 

کۆبوونەوەی رێکخستنەکانی ئاکپارتی لە پارێزگای دەنیزلی رۆژی دووشەممە 18-11-2024 بە ئامادەبوونی جەودەت یڵماز، یاریدەدەری سەرۆککۆماری تورکیا بەرێوەچوو.

 

یڵماز باسی لە هەنگاوە هەنووکەییەکانی ئاکپارتی و بەرەنگاربوونەوەیان لەگەڵ دۆخی خراپیی ئابووری کرد و رایگەیاند، جیهان بە گشتی و تورکیا بە تایبەتی بە دۆخێکی خراپدا تێدەپەڕن، گوتیشی: "سەرەڕای هەموو ئەم کێشانەی هەن، تورکیا لەسەر پێیەکانی خۆیەتی، سەقامگیری و سەقامگیریی سیاسیی هەیە. کەشی ئارامیی هەیە، چونکە بە بێ ئارامی هیچ شتێک دەستەبەر نابێت".

 

یاریدەدەری سەرۆککۆماری تورکی بەڵێنی دا ساڵی ئاییندە لەم کاتانەدا هەڵاوسان دادەبەزێننە تاکخانەیی و ئەو بابەتە لەسەر لیستی رۆژەڤی تورکیادا ناهێڵن.

 

بە گوێرەی راپۆرتی دامەزراوەی ئاماری تورکیا (تویک) کە رۆژی 4-11-2024 بڵاویکردەوە، رێژەی هەڵاوسانی ساڵانەی تورکیا بۆ مانگی تشرینی یەکەم 48.58٪ بووە.

 

ئەمە لەکاتێکدایە زۆر لە چاودێرانی ئابووری و رێکخراوانی تایبەت بە ئابووریی ئەو ئامارەی دەوڵەت رەتدەکەنەوە و دەڵێن، هەڵاوسانی تورکیا زۆر لەوە بەرزترە.