رووداو دیجیتاڵ
دەستەی چاودێریی کۆمەڵایەتیی عێراق دەڵێت، زیاتر لە 5000 فەرمانبەر لە هەرێمی کوردستان بە شێوەیەکی نایاسایی مووچەی چاودێریی کۆمەڵایەتیی حکومەتی عێراقیان وەرگرتووە. وەزارەتی کار و کاروباری کۆمەڵایەتیی هەرێمی کوردستان دەڵێت، "ئەو کەسانە لە رێگەی ئەپلیکەیشنێکەوە داواکارییان پێشکێش کردووە و دواتر ناویان گەڕاوەتەوە و مووچەیان وەرگرتووە، بێ ئەوەی ئێمە ئاگادار بین."
رۆژی چوارشەممە 18-09-2024 د. ئەحمەد خەلەف موسەوی، سەرۆکی دەستەی چاودێریی کۆمەڵایەتی لە وەزارەتی کار و کاروباری کۆمەڵایەتیی عێراق بە تۆڕی میدیایی رووداوی راگەیاند، لە چوارچێوەی رێککەوتنی نێوان حکومەتی فیدراڵیی عێراق و حکومەتی هەرێمی کوردستان بۆ بەجێکردنی مووچەی فەرمانبەرانی هەرێمی کوردستان، حکومەتی هەرێمی کوردستان هاوکارە و داتا و زانیارییەکانی لەبارەی مووچەی فەرمانبەران رادەستی بەغدا کردووە.
د. ئەحمەد خەلەف موسەوی گوتی، "دوای تەواوبوونی پرۆسەی وردبینی و هاوتاکردنی داتا و زانیارییەکانی فەرمانبەرانی هەرێمی کوردستان، دەرکەوت کە زیاتر لە 5 هەزار فەرمانبەر و کارمەند لە هەرێمی کوردستان بەشێوەیەکی نایاسایی هاوکاری کۆمەڵایەتیی وەزارەتی کار و کاروباری کۆمەڵایەتیی حکومەتی فیدراڵی عێراق وەردەگرن."
سەرۆکی دەستەی چاودێریی کۆمەڵایەتی ستایشی هەڵوێستی حکومەتی هەرێمی کوردستان دەکات و دەڵێت، "زۆر هاوکارە"؛ ئاماژە بەوەش دەکات، ئەو سەرپێچییانە بۆ ساڵانی 2016 تاوەکو 2021 دەگەڕێنەوە و گوتی، ئەو کەسانە "فەرمانبەری دام و دەزگاکانی حکومەتی هەرێمی کوردستانن، بەڵام مووچەی پاراستنی کۆمەڵایەتیی فیدراڵیی عێراقیان وەرگرتووە. ئەوان خەڵکی ناوچەکانی مادەی 140ن لە پارێزگای نەینەوا، کەرکووک و دیالە و بەشی زۆریان پێشمەرگەن. ئەو کارەش پێچەوانەی یاسایە."
ئەحمەد موسەوی گوتیشی، "لە رۆژی 15ی ئەم مانگەوە مووچەی چاودێریی کۆمەڵایەتی ئەو کەسانە راگیراوە و دەبێ ئەو پارەیەش بگەڕێننەوە کە وەریانگرتووە.بەشێکیان ئامادەییان دەربڕیوە پارەکە بەیەکەوە بگەڕێنەوە و بەشێکی دیکە بەش بەش پارەکە دەگەڕێننەوە."
هەر لەو بارەیەوە ئاریان ئەحمەد، گوتەبێژی وەزارەرتی کار و کاروباری کۆمەڵایەتیی هەرێمی کوردستان، رۆژی چوارشەممە 18-09-2024 بە تۆڕی میدیایی رووداوی گوت، "هیچ پەیوەندییەکمان بەو فەرمانبەرانەوە نییە کە مووچەی چاودێریی کۆمەڵایەتیان لە عێراق وەرگرتووە."
گوتەبێژی وەزارەتی کار و کاروباری کۆمەڵایەتیی هەرێمی کوردستان گوتیشی، "ئەو کەسانە لە رێگەی ئەپلیکەیشنێکەوە لە مۆبایلەکانیان داواکاریان پێشکێشکردووە و دواتر ناویان گەڕاوەتەوە و مووچەیان وەرگرتووە، بێ ئەوەی ئێمە ئاگادار بین. بەغدا ئازادە چ رێکارێکیان بەرامبەر دەگرێتەبەر."
ئاریان ئەحمەد دەشڵێت،" تاوەکو ئێستاش لەوبارەوە بە فەرمی وەزارەتی کار وکاروباری کۆمەڵایەتیی عێراق ئێمەی ئاگادار نەکردووەتەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ