ئابووریی ئیسرائیل لە چارەکی سێیەمی ئەمساڵدا 2.8% گەشەی کردووە

 

 

ناوەندی ئاماری ئیسرائیل ئەو داتایەی بڵاوکردەوە، بەڵام ئەو ئاستە کەمترە لە پێشبینییەکان، بەوپێیەی پێشبینی دەکرا لەو چارەکەدا ئابووریی ئیسرائیل 3.8% گەشە بکات.

 

هاوکات بەراورد بە چارەکی دووەمی ئەمساڵ کە 3.3% بووە، گەشەی ئابووریی ئیسرائیل لە چارەکی سێیەمدا دابەزیوە.

 

ئەمە لەکاتێکدایە، پێشبینی دەکرێت بەهۆی کاریگەرییەکانی شەڕی ئیسرائیلەوە لەگەڵ حەماس و گرووپە چەکدارەکانی غەززە، ئابووریی ئیسرائیل لە چارەکی چوارەمی ئەمساڵدا پاشەکشە بکات.

 

بانکی ناوەندیی ئیسرائیل دەڵێت، پێشبینی دەکەن لە چارەکی چوارەمی ئەمساڵدا ئابووریی ئیسرائیل 5% پاشەکشە بکات.

 

هەرچەندە پاشەکشەی ئابووری دەکرێت ببێتە هۆی کەمکردنەوەی خەرجییەکان و وەبەرهێنان، بەڵام بانکی ناوەندیی ئیسرائیل دەڵێت، بەهۆی شەڕی غەززەوە سوودی بانکی کەم ناکەنەوە کە ئێستا 4.75%ـە.

 

بانکی ناوەندیی ئیسرائیل دەڵێت، لە ئەگەری کەمکردنەوەی سوودی بانکیی، بەهای دراوی شیکڵی وڵاتەکە لاواز دەبێت و هەڵاوسان زیاد دەکات.

 

لە دوایین سێ کۆبوونەوەدا، سیاسەتداڕێژەرانی بانکی ناوەندیی ئیسرائیل رێژەی سوودیان بە جێگیریی هێشتووەتەوە. لەکاتێکدا رێژەکە لە 0.1% لە نیسانی 2022ـدا، بۆ 4.75% لە ئایاری ئەمساڵدا بەرزکراوەتەوە.

 

هاوکات دوێنێ چوارشەممە، ناوەندی ئاماری ئیسرائیل رایگەیاند، لە مانگی رابردوودا هەڵاوسان بۆ 3.7% دابەزیوە، لەکاتێکدا لە مانگی ئەیلوولدا 3.8% بوو.

 

بانکی ناوەندیی ئیسرائیل ئامانجیەتی هەڵاوسان بۆ 1% تاوەکو 3% کەمبکاتەوە.