رووداو دیجیتاڵ
بەگوێرەى پلانى کشتوکاڵى عێراق بۆ ساڵى 2022، نزیکەى 11 هەزار دۆنم زەوى کشتوکاڵى لە عێراق تەرخان دەکرێت بۆ چاندنى برنج، لەکاتێکدا ساڵى رابردوو رووبەرى چاندنى برنج 400 هەزار دۆنم بووە، جگە لەوەش تەنیا رێگە بە چاندنی یەک جۆر برنج دەدرێت.
حەمید نایف، گوتەبێژى وەزارەتى کشتوکاڵى عێراق بە تۆڕى میدیایی رووداوى راگەیاند؛ بەگوێرەى پلانى کشتوکاڵى بۆ ساڵى 2022 رووبەڕى چاندنى برنج لە عێراق کەمکراوەتەوە بۆ 10 هەزار و 800 دۆنم، لەکاتێکدا ساڵى رابردوو 400 هەزار دۆنم زەویی بۆ چاندنى برنج تەرخانکرابوو، ئەوەش بەهۆى رازینەبوونى وەزارەتى سەرچاوەکانى ئاوى عێراقە بە چاندنى برنج لەسەر ئەو رووبەرەى پێشوو، بە پاساوى ئەوەى کە ئەو جۆرە کشتوکاڵە پێویستى بە ئاوى زۆر هەیە و کاریگەریى نەرێنى دەبێت لەسەر کەمئاوى.
برنج لە شارەکانى ناوەڕاست و باشوورى عێراق، بە دیاریکراوى لە پارێزگانى نەجەف، دیوانیە، زيقار، بابل و موسەننا دەچێندرێت.
گوتەبێژى وەزارەتى کشتوکاڵى عێراق ئاماژەى بەوەدا بۆ پلانى کشتوکاڵى ئەمساڵ تەنیا رێگە بە دیوانیە و نەجەف دەدرێت، کە برنج بچێنن، ئەوانیش دەبێت تەنیا برنجی جۆری عەنبەر بچێنن، ئەویش بە مەبەستی هێشتنەوەى بنەتۆوى ئەو جۆرە برنجە و رێگریکردن لە فەوتانی.
بەگوێرەى پلانى وەزارەتى کشتوکاڵ لەو 10 هەزار و 800 دۆنەم زەویەى، کە بۆ چاندنى برنجى عەنبەر تەرخانکراوە، 3500 دۆنمى لە پارێزگاى دیوانیە و 6500 دۆنمى لە نەجەف دەبێت، ئەو 800 دۆنمەى دیکە بۆ بەمەستى لێکۆڵینەوەى زانستى دەچێندرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ