پاڵاوگەی سموود لە سنووری پارێزگای سەلاحەددین
رووداو دیجیتاڵ
چاککردنەوە و نۆژەنکردنەوەی پاڵاوگەی سموود لە سنووری پارێزگای سەلاحەددین بەردەوامە بۆ ئەوەی رۆژانە 150 هەزار بەرمیل نەوت بپاڵێوێت، بەپێی پلانیش تاوەکو کۆتایی ئەمساڵ، پێویستە کارەکانی تەواو بێت.
حەیان عەبدولغەنی، وەزیری نەوت لە پاڵاوگەکەوە قسە دەکات و دەڵێ "لە کاتی جەنگی داعشدا، تووشی وێرانکارییەکی گەورە بوو، بەڵام ئێستا چاککراوەتەوە و بەشێوەیەکی سرووشتی کار دەکات. پلان هەیە بۆ نۆژەنکردنەوەی پاڵاوگەکانی دیکەش."
کۆمپانیای پاڵاوگەی باکوور یەکێکە لە گرنگترین کۆمپانیاکانی پاڵاوتنی عێراق و پێش حوزەیرانی 2014، 30٪ـی نەوتی عێراقی دەپاڵاوت. بەڵام لەکاتی شەڕی داعشدا بەتەواوی لەکارکەوت و بەهۆیەوە عێراق نزیکەی 30 ملیار دۆلار زیانی بەرکەوت.
کۆمەڵگەی سموود کە پاڵاوگەی بێجیشی پێدەگوترێت لە پاڵاوگەکانی باکوور، سەلاحەدین یەک و دوو پێکهاتووە. بەنزین، گاز، کیرۆسین، نەفتا، گازی شل و چەند بەرهەمێکی دیکە بەرهەمدەهێنێت. وێڕای دابینکردنی بەرهەمە نەوتییەکان بۆ هاووڵاتییان و کەرتی پیشەسازی، سووتەمەنیش بۆ وێستگەکانی بەرهەمهێنانی کارەباش دابین دەکات.
عاسم جیهاد، گوتەبێژی وەزارەتی نەوت دەڵێ "بەدڵنیاییەوە بڕی بەرهەمە نەوتییەکان زیاد دەکات، بەشێکی گەورەی پێویستی نێوخۆیی دابین دەکات، قەبارەی هاوردەکردن کەمدەکاتەوە، پەنا بەخودا هەموو ئەمانە بە هەوڵی نیشتمانی و تواناکەیەوە بەردەست دەکرێن".
کۆمپانیای پاڵاوتنی باکوور، هەردوو پاڵاوگەی سەلاحەددین یەک و دووی نۆژەنکردووەتەوە، دەستی بە چاککردنەوەی پاڵاوگەی باکووریش کردووە بە توانای پاڵاوتنی 150 هەزار بەرمیل لە رۆژێکدا، دەیەوێت بیگەڕێنێتەوە سەردەمی پێش پەلاماری داعش کە ئەوکات رۆژانە 300 هەزار بەرمیل نەوت بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ