رووداو دیجیتاڵ
وەزارەتی کشتوکاڵ و سەرچاوەکانی ئاوی هەرێمی کوردستان گرێبەستێکی لەگەڵ کۆمپانیایەکی چینی بۆ دروستکردنی چوار بەنداو واژۆکرد، دوو لەبەنداوەکان لە پارێزگای سلێمانی، یەکێکیان لەهەولێر و ئەوی دیکەشیان لە دهۆک دەبێت.
رۆژی چوارشەممە، 16ی ئاداری 2022، وەزارەتی کشتوکاڵ و سەرچاوەکانی ئاوی حکومەتی هەرێمی کوردستان رایگەیاند بێگەرد تاڵەبانی وەزیری کشتوکاڵ و سەرچاوەکانی ئاو، لێکتێگەیشتننامەی دروستکردنی چوار بەنداوی "گرنگ و ستراتیژی" لەگەڵ گروپی نێودەوڵەتیی کۆمپانیاکانی (POWERCHINA) واژۆ کرد.
ئەو بەنداوانەی وەزارەتی کشتوکاڵ گرێبەستی بۆ کردوون، بریتین لە: بەنداوی دەڵگە لە پشدەر، بەنداوی خێوەتە لە سلێمانی، بەنداوی مەنداوە لە هەولێر و بەنداوی باکرمان لە دهۆک
لە راگەیێنەراوێکدا وەزارەتی کشتوکاڵ و سەرچاوەکانی ئاو روونیکردووەتەوە: "ئەم لێکتێگەیشتننامەیە لە چوارچێوەی هەوڵە بەردەوامەکانی حکومەتی هەرێمی کوردستان و وەزارەتی کشتوکاڵ و سەرچاوەکانی ئاوە بۆ چارەسەری کێشەی گڵدانەوەی ئاو و کەمکردنەوەی کاریگەرییەکانی دیاردەی وشکەساڵی و باشتر بەڕێوەبردنی ستراتیژی سەرچاوەکانی ئاوی هەرێمی کوردستان."
هەروەها هاتووە: "ئەم لێکتێگەیشتننامەیە لە چوارچێوەی یاسا و رێسا بەرکارەکانی حکومەت و وەزارەتی کشتوکاڵ و سەرچاوەکانی ئاو، لەگەڵ یەکێک لە کۆمپانیا بەهێزەکانی چین لە چوارچێوەی هەنگاوەکانی حکومەت بۆ دروستکردنی بەنداوە گرنگ و ستراتیژییەکان واژۆکراوە."
هەرێمی کورستان لە رێگەی 17 بەنداوەوە توانای گلدانەوەی 10 ملیار مەتر سێجا ئاوی هەیە، بە گوتەی بەڕێوەبەری بەنداوەکان، ئێستا نزیکەی پێنج ملیار مەتر سێجا ئاویان تێدایە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ