رووداو دیجیتاڵ
دامەزراوەیەکی توێژینەوە و راوێژی ئابووری رایگەیاند، پارەی دانراو لە بانکەکانی عێراق گەیشتووەتە نزیکەی 130 تریلیۆن دینار، لە کاتێکدا ساڵی رابردوو نزیکەی 100 تریلیۆن دینار بووە.
مەنار عوبەیدی، سەرۆکی دامەزراوەی عێراقی ئاییندە بۆ توێژینەوە و راوێژی ئابووری، بە تۆڕی میدیایی رووداوی راگەیاند، "ئەو پارانەی لە بانکەکانی بازرگانیی عێراق هەڵگیراون بە هەموو جۆرەکانی دراو لە مانگی حوزەیرانی ئەم ساڵ بەهای 129 تریلیۆن و 880 ملیار دیناری تێپەڕاندووە، بەوەش لەگەڵ ساڵی پار کە زیاتر لە 90 تریلیۆن دینار بووە، زۆر زیاد بووە."
سەرۆکی دامەزراوەی عێراقی ئاییندە بۆ توێژینەوە و راوێژی ئابووری گوتی، "رێژەی زیادبوونی ساڵانەی پارەی هەڵگیراو لە بانک دەگاتە 3.74%."
بە گوتەی عوبەیدی، "ئەو پارانەی لە بانک هەڵگیراون لە ژمێرەکانی بەردەوام و ژمێرەکانی جێگیر و پاشەکەوتن. ئەو پارانەی هەڵگیراون رێژەی 80%یان لە ژمێرەکانی بەردەوام بووە، کە زیاتر لە 104 تریلیۆن و 550 ملیار دینار دەبێت."
هەروەها ژمێرەکانی پاشەکەوتیش 16 تریلیۆن و 200 ملیار دیناریان تێدا بووە.
ئەو پارانەشی لە ژمێرەکانی جێگیر لە بانکەکاندا هەڵگیراون، 9 تریلیۆن و 130 ملیار دینار بووە.
سەرچاوەی پارە هەڵگیراوەکان لە بانکەکانی عێراق کەرتی تایبەت و حکومەتی فیدراڵی و دامەزراوەکانی گشتین.
مەنار عوبەیدی لەبارەی سەرچاوەکانەوە دەڵێت، "43%ی پارەکانی نێو بانگەکانی بازرگانی لەلایەن کەرتی تایبەتەوە دانراون کە 55 تریلیۆن و 890 ملیار دینار دەبێت، پارەکانی حکومەتی ناوەندیش کە 34.3%ی کۆی گشتی پارەکان پێکدەهێنێت، 44 تریلیۆن و 630 ملیار دینار دەبێت، بەڵام پارەکانی دامەزراوەکانی گشتی 22.6%ی کۆی پارەکانی بانکەکان پێکدەهێنێت و 29 تریلیۆن و 360 ملیار دینار دەبێت."
بەپێی حکومەتی عێراق لەنێوان 110 بۆ 110 تریلیۆن دیناری عێراق لە دەرەوەی بانکەکاندان، حکومەت کار بۆ گێڕانەوەی بۆ نێو بانکەکان دەدات و بۆ ئەو مەبەستە ئاسانکاریی تەواو بۆ بانکەکان و خەڵک دەکات، بەڵام هێشتا خەڵک دڵنیایی تەواوی لەلانییە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ