رووداو دیجیتاڵ
داهاتی هەناردەی نەوتی رووسیا لە مانگی ئایاردا بۆ نزمترین ئاست لەدوای مانگی شوباتی ئەمساڵەوە دابەزیوە، ئەوەش بەهۆی دابەزینی نرخی نەوتی ئەو وڵاتە لە بازاڕەکانی جیهاندا.
ئاژانسی نێودەوڵەتیی وزە رۆژی چوارشەممە 14-06-2023 رایگەیاند، لە مانگی رابردوودا کۆی داهاتی نەوتی رووسیا 13.3 ملیار دۆلار بووە، بەوەش بەراورد بە مانگی نیسان 1.4 ملیار دۆلار کەمبووەتەوە.
ئاژانسەکە دەشڵێت، بەراورد بە مانگی ئایاری ساڵی 2023، داهاتی نەوتی رووسیا 36% کەمبووەتەوە.
ئاژانسی وزە باس لەوە دەکات، سزاکانی رۆژئاوا و گرووپی وڵاتانی 7 بۆسەر رووسیا، لەنێویاندا قەدەخەی هاوردەی نەوتی ئەو وڵاتە لە رێگەی دەریاوە، کاریگەرییەکانیان لەسەر رووسیا دەرکەوتووە.
ئاژانسی نێودەوڵەتیی وزە دەڵێت، لە مانگی رابردوودا نەوت و بەرهەمە نەوتییەکانی رووسیا لە خوار نرخی ئاسایی بازاڕەکانی جیهان فرۆشراون؛ لەو مانگەدا نرخی بەرمیلێک نەوتی رووسیا 54.79 دۆلار بووە، لە کاتێکدا لە مانگی نیساندا 60.22 دۆلار بوو بۆ هەر بەرمیلێک.
ئەو ئاژانسە دەشڵێت، هەناردەی نەوتی رووسیا لە مانگی رابردوودا 7.8 ملیۆن بەرمیلی رۆژانە بووە، هەریەک لە چین و هیندستانیش زیاتر لە نیوەی نەوتی رووسیایان هاوردە کردووە.
رۆژی سێشەممە 16-05-2023 ئاژانسی نێودەوڵەتیی وزە بڵاویکردەوە، لە مانگی نیساندا هەناردەی نەوتی رووسیا گەیشتووەتە بەرزترین ئاست لەدوای شەڕی ئۆکرایناوە، بەوەش داهاتەکەی بە بڕی 1.7 ملیار دۆلار زیاد بووە.
ئاژانسەکە باسی لەوەش کردبوو، لە مانگی نیساندا هەناردەی نەوتی رووسیا بە بڕی 500 هەزار بەرمیل لە رۆژێکدا زیاد بووە و گەیشتووەتە 8.3 ملیۆن بەرمیلی رۆژانە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ