رووداو دیجیتاڵ
هێشتا ئەو شەڕە بازرگانییەی کە لە ئارادایە و رۆژانە دۆناڵد ترەمپ یان تووندی دەکات یان خاوی دەکاتەوە، بە هۆکاری سەرەکیی دابەزینی نرخی نەوت هەژمار دەکرێت.
رۆژی دووشەممە نرخی یەک بەرمیل نەوتی برێنتی دەریای باکوور 29 سەنت دابەزی و بە 64 دۆلار و 47 سەنت مامەڵەی پێوەکرا. نرخی نەوتی سووکی تەکساسیش 27 سەنت دابەزی و بە61 دۆلار و 23 سەنت مامەڵەی پێوەکرا.
هەردوو نرخی نەوتی برێنت و سووکی تەکساس لە سەرەتای ئەم مانگەوە تاوکو ئێستا 10 دۆلار لە بەهای خۆیان لەدەستداوە، بەهۆی شەڕی بازرگانی و سەپاندنی پێناسە گومرکییەکانی لەلایەن ئەمریکا و چینەوە.
بانکی گۆڵدمان ساکس پێشبینی کردووە، تاوەکو کۆتایی ئەم ساڵ نرخی نەوتی برێنت لە نزیکەی 63 دۆلار و نرخی نەوتی سووکی تەکساسی ئەمریکاش لە دەوروبەری 59 دۆلار مامەڵەی پێوەبکرێت.
شرۆڤەکاران پێیانوایە، هەرچەندە پێشبینیکراوە لە چارەکی چوارەمی ئەمساڵدا خواست بۆ بەکارهێنانی نەوت رۆژانە 300 هەزار بەرمیل زیاد بکات، بەڵام رووبەڕووبوونەوەی ئەمریکا و چین لە شەڕی بازرگانی، بە ئەگەری زۆرەوە دەبێتە هۆکار بۆ کەمبوونەوەی خواست بۆ بەکارهێنانی نەوتی خاو. ئەمریکا پێناسی گومرکی بەڕێژەی 145٪ و چین بەڕیژەی 125٪ لەسەر کاڵای وڵاتی بەرامبەر سەپاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ