عێراق و ئیسرائیل لە لیستی گەورەترین هەناردەکارانی تورکیا لادەبرێن

 

وەزارەتی بازرگانیی تورکیا "لیستی هەناردەی بۆ وڵاتانی ئامانج" بۆ ساڵی 2024 ئامادەکرد و، رەوانەی دەستەی گشتیی پەیوەندییە ئابوورییەکانی دەرەوە و یەکێتیی بۆرسە و ژوورە بازرگانییەکانی تورکیای کرد.

 

ئەو لیستە هەموو ساڵێک ئامادە دەکرێت و ئەو وڵاتانە دیاری دەکات، کە تورکیا ئامانجی ئەوەیە زۆرترین هەناردەیان بۆ بکات. ئەمساڵ 56 وڵات لەو لیستەدا هەن.

 

وەزارەتی بازرگانیی تورکیا بۆ ئەمساڵ عێراق، ئیسرائیل، مۆزەمبیق، کۆماری کۆنگۆی دیموکرات و سوودانی لەو لیستەدا لابردووە کە لە لیستی ساڵی 2023ـدا هەبوون. لەبری ئەوە چەند وڵاتێکی نوێی خستە لیستەکەوە کە بریتین لە بەنگلادیش، بەحرێن، بۆسنیا، جەزائیر، چیک، پورتوگال، تونس، عومان و ئوردن کە ساڵی رابردوو لە لیستەکەدا نەبوون.

 

محەممەد کایا، سەرۆکی دەستەی کارگێڕیی ژووری پیشەسازی و بازرگانیی ئامەد، ئەمڕۆ (یەکشەممە 14ـی کانوونی دووەمی 2024) سەبارەت بەو بابەتە و بەتایبەتی کاریگەرییەکانی بڕیارەکەی وەزارەتی بازرگانیی تورکیا لەسەر بازرگانانی باکووری کوردستان و تورکیا لەگەڵ باشووری کوردستان و عێراق وەڵامی پرسیارەکانی تۆڕی میدیایی رووداوی دایەوە.

 

محەممەد کایا بڕیارەکەی وەک "گورزێکی گەورە'' لە بازرگانانی باکووری کوردستان و تورکیا ناوبرد و گوتی، "ئێمە، سنوورمان لەگەڵ هەرێمی کوردستان و عێراق هەیە. زۆر کۆمپانیای گەورەی تورکیا لە هەرێمی کوردستان و عێراق کاردەکەن. دەرکردنیان لە لیستەکەدا بە هەر هۆکارێک بێت، بڕیارێکی هەڵەیە و دوورە لە لۆژیک، لەکاتێکدا عێراق لە لیستی وڵاتانی سەرەکیی هەناردەکردنی تورکیادایە."

 

کایا ئاماژەی بەوەش دا؛ عێراق و باشووری کوردستان بازاڕی سەرەکین بۆ هەناردەی تورکیا و بەتایبەتی بۆ هەناردەکردنی بەرهەمەکانی باکووری کوردستان، گوتی، "ئێمە پێشتر زۆر بەرهەممان هەناردە دەکرد کە لە ناوچەکەماندا بەرهەمدەهێنران. بڕیارەکە بە هەر هۆکارێک درابێت، بڕیارێکی هەڵەیە و هیوادارم لەو هەڵەیە بگەڕێنەوە."

 

سەرۆکی ژووری بازرگانیی ئامەد دەڵێت، هەوڵدەدەن ئاستی بازرگانیی نێوان تورکیا و عێراق و هەرێمی کوردستان لە رێگەی پەیوەندی، پێشانگە و کردنەوەی دەروازەی سنووری نوێوە بەرزبکەنەوە، گوتی، "لەکاتێکدا بۆ یەکەمینجار لە 2022ـدا گەیشتوینەتە ئاستی پێش ساڵی 2015. ئەم بڕیارە رێگری گەورە لەبەردەم بازرگانیی هەردوولادا دروست دەکات."