رووداو دیجیتاڵ
بانکی ناوەندیی عێراق زیاتر لە 207 ملیۆن دۆلاری فرۆشت؛ لەو بڕە تەنیا 22 ملیۆن و 710 هەزار دۆلاری بە نەختینە داوەتە بانکەکان. ئەمڕۆش بەهای دینار دابەزی و 100 دۆلار بە 153 هەزار دینارە.
رۆژی یەکشەممە 13ـی ئابی 2023، دوای رۆژانی پشووی هەفتە، بانکی ناوەندیی عێراق 207 ملیۆن و 684 هەزار و 288 دۆلاری فرۆشت؛ لەو بڕە 22 ملیۆن و 710 هەزار دۆلاری بە نەختینە و ئەوی دیکەی بۆ حەواڵەیە.
ئەمڕۆ کاژێر 11:00، حاجی سابیر باواجی، ئەندامی ئەنجوومەنی گۆڕینەوەی دراو لە هەولێر بە تۆڕی میدیایی رووداوی گوت، دوای فرۆشتنی دۆلار لەلایەن بانکی ناوەندییەوە، بەهای دینار دابەزی و 100 دۆلار بە 153 هەزار دینار مامەڵەی پێوەدەکرێت.
ئەمڕۆ لەکاتی کردنەوەی بازاڕی دراودا 100 دۆلار بە 152 هەزار و 700 دینار مامەڵەی پێوەکرا.
بەهای تمەن بەرامبەر دۆلار بەرزبووەتەوە. حاجی سابیر باواجی گوتی، ئەمڕۆ 100 دۆلار بەرامبەر 4 ملیۆن و 450 هەزار تمەنی ئێرانییە لەکاتێکدا هەفتەی رابردوو، 100 دۆلار بە نزیکەی 4 ملیۆن و 900 هەزار تمەن بوو.
بانکی ناوەندیی عێراق رۆژانە 100 دۆلار بە 131 هەزار دینار دەفرۆشێت، بەڵام نەیتوانیوە بەهای دینار لە بازاڕەکاندا بەرامبەر دۆلار بەرزبکاتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ