رووداو دیجیتاڵ
سەرۆکی نوێنەرایەتیی حکومەتی هەرێمی کوردستان لە بەغدا دەڵێت، هەموو رێکارەکانی ناردنی 400 ملیار دینارەکە لە رێگەی بانکی TBIیەوە بۆ هەرێمی کوردستان تەواوکراون و پێدەچێت ئەمڕۆ پارەکە بخرێتە سەر هەژماری وەزارەتی دارایی هەرێمی کوردستان.
ئەمڕۆ یەکشەممە، 12-03-2023، فارس عیسا، سەرۆکی نوێنەرایەتیی حکومەتی هەرێمی کوردستان لە بەغدا بە رادیۆی رووداوی گوت، پێشتر بە بڕیاری ئەنجوومەنی وەزیران شاندێک بۆ دانوستاندن لەگەڵ بەغدا پێکهێندراوە و شاندەکە هەمان شاندەکەی پێشووە، لەلایەن حکومەتی فیدراڵیی عێراقیشەوە شاندێک بە سەرۆکایەتیی د. محەممەد تەمیم، وەزیری پلاندانانی عێراق پێکهێندراوە بۆ گفتوگۆکردن لەسەر چارەسەرکردنی کێشەکانی نێوان هەولێر و بەغدا.
بەگوێرەی زانیارییەکانی تۆڕی میدیایی رووداو، ئەو شاندەی ئەمڕۆ یەکشەممە دەچێتە بەغدا شاندێکی تەکنیکیی حکومەتی هەرێمی کوردستانە بە سەرپەرشتیی عەبدولکەریم خەسرەو، سەرۆکی فەرمانگەی هەماهەنگی و بەدواداچوونی حکومەتی هەرێمی کوردستان.
بەگوێرەی زانیارییەکانی تۆڕی میدیایی رووداو، ئەو شاندەی حکومەتی هەرێمی کوردستان کە ئەمڕۆ یەکشەممە دەچێتە بەغدا شاندێکی تەکنیکییە بە سەرپەرشتیی عەبدولکەریم خەسرەو، سەرۆکی فەرمانگەی هەماهەنگی و بەدواداچوونی حکومەتی هەرێمی کوردستان.
سەرۆکی نوێنەرایەتیی حکومەتی هەرێمی کوردستان لە بەغدا گوتی: "لەنێوان هەردوو شاندەکەی هەولێر و بەغدا سێ لیژنەی لاوەکی و تەکنیکی هەن بۆ گفتوگۆکردن و گەیشتن بە رێککەوتن لەسەر پرسی بودجە، دەروازە سنوورییەکان، یاسای نەوت و گازی فیدرالی. گفتوگۆکان بەشێویەکن ئێستا لە بابەتی بودجە نزیکین لە رێککەوتنی کۆتایی لەبارەی پشکی هەرێمی کوردستانەوە کە 12.67٪ دیاریکراوە و لە بابەتی دەروازە سنوورییەکانیش لێکتێگەیشتنی باش هەیە و نزیکین لە رێککەوتن".
بەگوتەی فارس عیسا، سەردانی شاندی دانوستاندنکاری هەرێمی کوردستان بۆ بەغدا بۆ گفتوگۆکردنە لەسەر رەشنووسی پڕۆژەیاسای نەوت و گاز و ئەمڕۆ شاندەکە دەگاتە بەغدا و سبەی کۆبوونەوەکانی لەگەڵ وەزارەتی نەوت دەستپێدەکات.
فارس عیسا باس لەوە دەکات کە لە نێوان هەولێر و بەغدا لەسەر هێڵە گشتییەکانی رەشنووسی یاسای نەوت و گاز لێکتێگەیشتن هەیە و کار لەسەر ئامادەکردنی رەشنووسەکە دەکەن.
سەرۆکی نوێنەرایەتیی حکومەتی هەرێمی کوردستان لە بەغدا دەڵێت، "ئەنجوومەنی وەزیرانی عێراق دووجار بڕیاری ناردنی 400 ملیارەکەی داوە و دوایینجار بڕیاربووە لە رێگەی بانکی بازرگانیی عێراقی TBI بۆ هەرێمی کوردستان بنێردرێت. رۆژی چوارشەممە، وەزیری دارایی هەرێمی کوردستان دوایین واژۆی لەسەر گرێبەستەکە کرد و هەندێک لە رێکارەکان مابوون تەواوکران. رۆژی پێنجشەممە لەگەڵ بانکی ناوەندی و TBI لەسەر هێڵ بووین بۆ تەواوکردنی رێکارەکان و تەنانەت یەک کاژێر دەوامی TBIمان زیادکرد، بەڵام هەندێک رێکاری کەمی ماوە کە ئەمڕۆ کۆتایی پێدەهێنین و پێشبینی دەکەین ئەمڕۆ یەکشەممە پارەکە بگات."
لەبارەی دیاریکردنی رێژەی 12.67٪ـی بودجە وەکو پشکی هەرێمی کوردستان، فارس عیسا گوتی، "ئەو رێژەیەی دیاریکراوە هیچ بنەمایەکی یاسایی نییە و بڕیارێکی سیاسییە". دەشڵێت، "رێژەکە بەمجۆرە دەبێت تاوەکو سەرژمێریی دانیشتووان دەکرێت و جیاوازییەکە بۆ هەرێمی کوردستان دەگەڕێندرێتەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ