رووداو دیجیتاڵ
نزیکەی شەش مانگە بەهای لیرەی تورکی بەرامبەر دۆلار و دراوە بییانییەکانی دیکە لە دابەزیندایە. لیرە لە شەش مانگی رابردوودا نزیکەی 10٪ی بەهای خۆی لەدەستداوە.
بەیانی ئەمڕۆ هەینی، 12ـی کانوونی دووەمی 2024، بەهای لیرە بەرامبەر دۆلار و دراوە بیانییەکان جارێکی دیکە دابەزی و ژمارەیەکی پێوانەیی تۆمارکرد.
لەگەڵ کرانەوەی بۆرسە و بازاڕە داراییەکانی تورکیا، یەک دۆلاری ئەمریکی بە 30.01 لیرە مامەڵەی پێوەکرا؛ دواتر یەک دۆلار بە 29.98 لیرە مامەڵەی پێوەکرا، بەڵام ئێوارە و بەر لە داخرانی بازاڕی دراوەکان، یەک دۆلار بۆ 30.10 لیرە بەرزبووەوە و بەوەش لیرەی تورکی داتەپینێکی نوێی تۆمارکرد.
هاوکات، یەک یۆرۆ بە 32.96 لیرە و یەک پاوەندی ئیستەرلینی بە 37.84 لیرە مامەڵەی پێوە کرا.
بەر لە هەڵبژاردنی پەرلەمانی تورکیا لە 14ـی ئایاردا یەک دۆلار بە 19.60 لیرە مامەڵەی پێوە دەکرا؛ لە دووەم گەڕی هەڵبژاردنی سەرۆکایەتیی تورکیا کە لە 28ـی ئایار بەڕێوەچووو، بۆ یەکەمینجار بەهای یەک دۆلار 20 لیرەی تێپەڕاند و لە 26ـی حوزەیرانیشدا بەهای یەک دۆلار گەیشتە 26 لیرە.
بانکی ناوەندیی تورکیا رۆژی 21ـی کانوونی یەکەمی 2023 رێژەی سوودی بانکی لە 40٪ بۆ 42.5٪ بەرزکردەوە.
ئەمە لە کاتێکدایە بانکی ناوەندیی تورکیا ساڵی 2022 چوار جار لەسەر یەک سوودی بانکی کەمکردەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ