سامانە سرووشتییەکان: حکومەتی عێراق 50 ملیۆن لیتر نەوتی بۆ هەرێمی کوردستان تەرخان کرد

 

رۆژی پێنجشەممە، 12-1-2023، وەزارەتی سامانە سرووشتییەکانی هەرێمی کوردستان رایگەیاند، کاروانی یەکەمی ئەو بڕە نەوتە گەیشتووەتە هەولێر و "وەزارەتی سامانە سروشتییەكان ئەم بڕە نەوتە بەسەر پارێزگاكانی هەرێمی كوردستان و ئیدارە سەربەخۆكان و ناوچە جیاجیاكانی كوردستان بە هەمان نرخی دابینكراو دابەش دەكات."

 

لە راگەیێندراوی وەزارەتەکەدا هاتووە، "پاش سەردانەكەی رێزدار مەسرور بارزانی، سەرۆكی حكومەتی هەرێمی كوردستان و شاندی یاوەری لە 11ـی ئەم مانگە بۆ بەغدا كە چەندین بابەتی تایبەت بە كێشە هەڵپەسێردراوەكان گفتوگۆیان لەبارەوە كرا،  تەوەرێكی ئەم گفتوگۆیانە تایبەت بوو بە دابینكردنی نەوتی سپی بۆ هاووڵاتییانی هەرێمی كوردستان. بە خۆشحاڵییەوە توانرا بڕی 50 ملیۆن لیتر نەوتی سپی بۆ هەرێمی كوردستان تەرخان بكرێت."

 

رۆژی چوارشەممە، 11-1-2023، شاندێکی هەرێمی کوردستان بە سەرۆکایەتیی مەسرور بارزانی، سەرۆکوەزیرانی هەرێمی کوردستان گەیشتە بەغدا. لە یەکەم وێستگەی سەردانەکەیدا مەسرور بارزانی لەگەڵ محەممەد شیاع سوودانی کۆبووەوە، دواتریش لەگەڵ سێ سەرۆکایەتییەکەی دیکە، ئەنجوومەنی دادوەری، ئەنجوومەنی نوێنەران و سەرۆکایەتیی کۆمار کۆبووەوە.

 

لە بەشێکی دیکەی راگەیێندراوەکەدا، وەزارەتی سامانە سرووشتییەکان باس لەوە دەکات، "پێشتر نرخی هەر لیترێك نەوتی سپی بە 750 دینار دەستنیشان كرابوو، جەنابی سەرۆكی حكومەت لەم سەردانەیدا داوای كرد ئەم نرخە بۆ هاووڵاتییانی كەمبكرێتەوە، بۆیە وەزارەتی نەوتی عێراق رازیبوو ئەم نرخە بۆ 500 دینار بۆ هەر لیترێك كەمبكاتەوە."

 

یەکەم کاروانی نەوتەکە ئەمڕۆ پێنجشەممە گەیشتە هەولێر. وەزارەتی سامانە سرووشتییەکان دەڵێت، "ئەم بڕە نەوتە بەسەر پارێزگاكانی هەرێمی كوردستان و ئیدارە سەربەخۆكان و ناوچە جیاجیاكانی كوردستان بە هەمان نرخی دابینكراو دابەش دەكەین".