وەزارەتی بازرگانیی عێراق: زیاتر لە 6 ملیۆن تۆن گەنم وەرگیراوە

 

محەممەد حەنوون، گوتەبێژی وەزارەتی بازرگانیی عێراق، بەتۆڕی میدیایی رووداوی راگەیاند: "وەرگرتنی گەنم لە پارێزگاکانی هەرێمی کوردستان بەردەوامە، دوای ئەوەی لە وەرگرتنی گەنمی جووتیارانی پارێزگاکانی نێوەڕاست و باشووری عێراق سەرکەوتووبووین، بڕی ئەو گەنمەشی تاوەکو ئێستا وەرگیراوە گەیشتووەتە شەش ملیۆن تۆن."

 

بە گوتەی ئەو بەرپرسەی وەزارەتی بازرگانی: "هاوئاهەنگیی باش لەنێوان وەزارەتی بازرگانیی عێراق و حکومەتە خۆجێیەکانی پارێزگاکان و ئەنجوومەنی پارێزگاکان هەیە، جگە لە هاوئاهەنگیی ئاست بەرز لەگەڵ وەزارەتی بازرگانی و پیشەسازیی حکومەتی هەرێمی کوردستان."

 

محەممەد حەنوون گوتی: "بەپێی ئەو رێککار و رێنماییانەی کۆمپانیای بازرگانیی دانەوێڵە دایڕشتووە، هەموو گەنمی ئەم ساڵ وەردەگیرێت و رێگە بە هاتنەناوەوەی گەنمی کۆگاکانی دیکە نادرێت کە هی ساڵانی رابردوون."

 

محەممەد حەنوون، پەسنی ئەو پشکنینە تاقیگەییانەشی کرد کە بۆ رێگری لە سەرپێچییەکانی ساڵانی رابردوو دەکرێن و، گوتیشی: "ئەم ساڵ ساڵی خۆبژێوییە لە بەرهەمی گەنم و رەنگە لەگەڵ بەردەوامیی وەرزی وەرگرتنەوەی گەنم بگەین بە ژمارەیەکی دیکە و وەرگرتنەوەی بڕی دیکەی گەنم."

 

عێراق ساڵانە پێویستی بە بڕی چوار ملیۆن و 200 هەزار تۆن گەنم هەیە بۆ ئەوەی بگاتە ئاستی خۆبژێوی، بەڵام ئەمساڵ تاوەکو ئێستا زیاتر لە شەش ملیۆن تۆن گەنمی لە جووتیاران کڕیوەتەوە.