رووداو دیجیتاڵ
گوتەبێژی وەزارەتی بازرگانیی عێراق رایگەیاند، لە وەرزی وەرگرتنی گەنمدا سەرکەوتنی باشیان بەدەستهێناوە و تاوەکو ئێستا شەش ملیۆن تۆن گەنمیان وەرگرتووە، دەشڵێت، وەرگرتنی گەنم لە پارێزگاکانی هەرێمی کوردستان بەردەوامە.
محەممەد حەنوون، گوتەبێژی وەزارەتی بازرگانیی عێراق، بەتۆڕی میدیایی رووداوی راگەیاند: "وەرگرتنی گەنم لە پارێزگاکانی هەرێمی کوردستان بەردەوامە، دوای ئەوەی لە وەرگرتنی گەنمی جووتیارانی پارێزگاکانی نێوەڕاست و باشووری عێراق سەرکەوتووبووین، بڕی ئەو گەنمەشی تاوەکو ئێستا وەرگیراوە گەیشتووەتە شەش ملیۆن تۆن."
بە گوتەی ئەو بەرپرسەی وەزارەتی بازرگانی: "هاوئاهەنگیی باش لەنێوان وەزارەتی بازرگانیی عێراق و حکومەتە خۆجێیەکانی پارێزگاکان و ئەنجوومەنی پارێزگاکان هەیە، جگە لە هاوئاهەنگیی ئاست بەرز لەگەڵ وەزارەتی بازرگانی و پیشەسازیی حکومەتی هەرێمی کوردستان."
محەممەد حەنوون گوتی: "بەپێی ئەو رێککار و رێنماییانەی کۆمپانیای بازرگانیی دانەوێڵە دایڕشتووە، هەموو گەنمی ئەم ساڵ وەردەگیرێت و رێگە بە هاتنەناوەوەی گەنمی کۆگاکانی دیکە نادرێت کە هی ساڵانی رابردوون."
محەممەد حەنوون، پەسنی ئەو پشکنینە تاقیگەییانەشی کرد کە بۆ رێگری لە سەرپێچییەکانی ساڵانی رابردوو دەکرێن و، گوتیشی: "ئەم ساڵ ساڵی خۆبژێوییە لە بەرهەمی گەنم و رەنگە لەگەڵ بەردەوامیی وەرزی وەرگرتنەوەی گەنم بگەین بە ژمارەیەکی دیکە و وەرگرتنەوەی بڕی دیکەی گەنم."
عێراق ساڵانە پێویستی بە بڕی چوار ملیۆن و 200 هەزار تۆن گەنم هەیە بۆ ئەوەی بگاتە ئاستی خۆبژێوی، بەڵام ئەمساڵ تاوەکو ئێستا زیاتر لە شەش ملیۆن تۆن گەنمی لە جووتیاران کڕیوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ