بەڕێوەبەری سایلۆکانی سلێمانی: 15 هەزار تۆن گەنم لە جووتیاران وەرگیراوە

 

نەسرین ئەحمەد، بەڕێوەبەری سایلۆکانی سلێمانی، میوانی پۆدکاستی بەکاتی سلێمانی بوو کە هەفتانە ئاسۆ سەراوی پشێکشی دەکات رایگەیاند، ئەم ساڵ یەک ملیۆن و 193 هەزار دۆنم زەوی لە سنووری پارێزگاکانی سلێمانی و هەڵەبجە و ئیدارەکانی گەرمیان و راپەڕین کراونەتە دانەوێلە.

 

گوتیشی، بۆ ئەم ساڵ لەو 700 هەزار تۆن گەنمەی کە بەغدا لە هەرێمی کوردستانی وەردەگرێت، بڕی 282 هەزار و 660 تۆن گەنمی لە سنوورەکەی ئەوان دەبێت کە رێژەی 40٪ی هەرێمی کوردستان دەکات، کە ئەم رێژەیەش بۆ پارێزگاکانی سلێمانی و هەڵەبجە و ئیدارەکانی گەرمیان و راپەڕین دەبێت و رێگەی شەش سایلۆ؛ پیرمەگروون، چەمچەماڵ، رانیە، سەیدسادق، هەڵەبجە و کەلار گەنمی جووتیاران وەردەگیرێت.

 

نەسرین ئەحمەد ئاماژەی بەوەکرد: "بەغدا لە هەر دۆنمێک زەویی چێنراو بە گەنم بڕی 236 کیلۆگرام لە جووتیاران وەردەگیرێت، لەکاتێکدا لەبەغدا و ناوچەکانی دیکە وەرگرتنی گەنم کراوەبووە."

 

لەبارەی دەستپێکردنی وەرگرتنی گەنم گوتیشی، لە رۆژی 6ی حوزەیرانەوە، لە پیرەمەگروون، چەمچەماڵ، رانیە و سەیدسادق دەستکراوە بەوەرگرتنی گەنم و لەرۆژی یەکشەمەوە لە کەلار دەستیپێکردووە و دوێنێش لە هەڵەبجە دەستی پێکردووە.

 

گوتیشی، رۆژانە نزیکەی 80 بارهەڵگر گەنم وەردەگیرێت و تاوەکو نیوەڕۆی ئەمڕۆ 15 هەزار تۆن گەنم لە جووتیاران وەرگیراون و وەرگرتنی گەنم بە هاوئاهەنگی لەگەڵ کشتوکاڵی ناوچەکان دەبێت و بەنۆرە گەنمی جووتیاران وەردەگرێت.

 

لەبارەی خەرجکردنی پارەی گەنمی جووتیاران، بەڕێوەبەری سایلۆکانی سلێمانی دەڵێت: "پێش دەستپێکردنی وەرگرتنی گەنم بڕی سێ ملیار دینارمان بۆ هاتووە وەکو پێشینەی یەکەم و بڕیارە بەمنزیکانە بەغدا بڕی 20 ملیار دینار بۆ پارەی گەنمی جووتیاران بێت کە 10 ملیاری بۆ پارێزگای سلێمانییە و دابەشی دەکەین بەسەر سایلۆکاندا."

 

لەبارەی پشووی رۆژانی جەژن و کارکردنی سایلۆکان، ئاماژەی بەوەکرد، بێجگە لە رۆژانی هەینی، هەموو رۆژێک لە کاژێر 8:30 بۆ کاژێر 5:00ی ئێوارە کاردەکەن، بۆ جەژنیش تەنیا یەکەم رۆژ و دووەم رۆژی جەژن پشوویان دەبێت.

 

لەبارەی پشکنین و رەتکردنەوەی ئەو گەنمانەی لە پشکنین دەرناچن، گوتی: "ئەو گەنمەی هی ساڵانی رابردوو بێت لە پشکنین دەردەکەوێت و وەرناگرێت، هەروەها ئەو گەنمانەی کە بڕشتی باش نییە و لە پشکنین دەرناچن رەتدەکرێنەوە، بەشێوەیەک لە رۆژانی رابردوودا 10 بارهەڵگر گەنم رەتکراونەتەوە."