رووداو دیجیتاڵ
نزیکەی شەش مانگە لەسەر یەک بەهای لیرەی تورکی بەرامبەر بە دۆلار و دراوە بیانییەکانی دیکە بەردەوامە لە دابەزین، بە ساڵی نوێوە لە شەش مانگی رابردوودا نزیکەی 10٪ ـی بەهای خۆی لەدەستداوە.
ئێوارەی ئەمڕۆ پێنجشەممە، 11ـی کانوونی دووەمی 2024، بەهای لیرە بەرامبەر دۆلار و دراوە بیانییەکان دابەزی و ژمارەیەکی پێوانەیی نوێی تۆمارکرد.
لەگەڵ کرانەوەی بۆرسە و بازاڕە داراییەکانی تورکیا، یەک دۆلاری ئەمریکی بە 29.92 لیرە مامەڵەی پێوەکرا. دواتر بە گەڕانەوەی نرخ یەک دۆلار بە 29.90 لیرە مامەڵەی پێوەکرا. بەڵام لە کاتی ئێوارە و بەر لە داخرانی بازاڕی دراوەکان، یەک دۆلار بە 30.2 لیرە بەرزبووەوە و بەمەش لیرەی تورکی داتەپینێکی نوێی تۆمارکرد.
هاوکات، یەک یۆرۆ بە 32.92 لیرە و یەک پاوەندی ستەرلینی بە 37.80 لیرە مامەڵەی پێوە دەکرێت.
بەر لە هەڵبژاردنەکانی پەرلەمانی تورکیا لە 14ـی ئایاردا یەک دۆلار بە 19.60 لیرە مامەڵەی پێوە دەکرا؛ لە دووەم گەڕی هەڵبژاردنی سەرۆکایەتی تورکیا کە لە 28ـی ئایار کرا، بۆ یەکەمینجار بەهای یەک دۆلار 20 لیرەی تێپەڕاند و دوای هەڵبژاردنەکان بۆ یەکەمجار لە 26ـی حوزەیراندا بەهای یەک دۆلار گەیشتە 26 لیرە.
بانکی ناوەندیی تورکیا رۆژی پێنجشەممە، 21ـی کانوونی یەکەمی 2023 رێژەی سوودی بانکی لە 40٪ بۆ 42.5٪ بەرزکردەوە.
ئەمە لە کاتێکدایە بانکی ناوەندیی تورکیا ساڵی 2022 چوار جار لەسەر یەک سوودی بانکی کەمکردەوە و لە کۆبوونەوەی شوباتی 2023 ـدا سوودی بانکی لە 9٪ بۆ 8.5٪ کەمکردبووەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ