وەزارەتی دارایی: هەفتەی داهاتوو مووچەی خانەنشینانی یەکەی 70 دابەش دەکەین
رووداو دیجیتاڵ
وەزارەتی دارایی هەرێمی کوردستان دەڵێت، وەزیری دارایی بڕیاریداوە بە خەرجکردنی مووچەی مانگی ئابی خانەنشینانی هێزەکانی یەکەی 70 و سەرەتای هەفتەی داهاتوو دابەش دەکرێت.
وەزارەتی دارایی هەرێمی کوردستان، لە راگەیێندراوێکدا ئەمڕۆ پێنجشەممە هەروەها دەڵێت، "لەسەر بنەمای گفتوگۆ و رێکەوتنی نێوان وەزارەتی دارایی و نووسینگەی جێگری سەرۆکوەزیرانی هەرێمی کوردستان و وەزارەتی پێشمەرگە، کە [رێکەوتنەکە ئەمەیە:] پێویستە تا کۆتایی ئەم ساڵ دۆسیەی سەرجەم خانەنشینانی هێزەکانی یەکەی 70 رەوانەی بەڕێوەبەرایەتیی خانەنشینی لە وەزارەتی پێشمەرگە بکرێت و دوای وردبینی و پەسندکردنیان، دۆسییەکان رەوانەی وەزارەتی دارایی بکرێن".
وەزارەتی دارایی ئاماژەی بەوەش کردووە، "بە بڕیاری بەڕێز ئاوات شێخ جەناب، وەزیری دارایی و ئابووری تەمویلی مووچەی مانگی ئابی خانەنشینانی هێزەکانی یەکەی 70 کرا و لەسەرەتای هەفتەی داهاتوو مووچەکانیان دابەش دەکرێت".
لە لایەکی دیکە، هەر ئەمڕۆ، سەمیر هەورامی، گوتەبێژی جێگری سەرۆکوەزیران بە رووداوی راگەیاند، کێشەی مووچەی خانەنشینانی یەکەی 70 چارەسەر کرا و بڕیار دراوە بە خەرجکردنی مووچەکانیان.
دوێنێ چوارشەممە، هونەر جەمال، گوتەبێژی وەزارەتی دارایی هەرێمی کوردستان لە کۆنفرانسێکی رۆژنامەڤانیدا گوتی، "بەغدا تەنیا مانگی دوو و سێ پارەی بۆ مووچەی خانەنشینانی هێزەکانی 70 ناردووە، لە مانگی چوارەوە یەک دینار لە بەغداوە نەهاتووە. لە چوار مانگی رابردوودا وەزیری دارایی لەسەر بەرپرسیارێتیی خۆی بڕیاری خەرجکردنی مووچەکانی داوە بە مەرجێک لە ماوەی مانگێکدا کێشەکانیان چارەسەر بکرێت، بەڵام دیارە هێشتا کێشەکانیان بەردەوامە".
باسی لەوەش کرد، "وەزیری دارایی هیچ ناچار نییە ئەو بەرپرسیارێتییە هەڵبگرێت لەکاتێکدا هیچ دۆسیەیەک، هیچ نووسراوێکیان نە لە وەزارەتی دارایی، نە لە بەڕێوەبەرایەتیی خانەنشینی، نە بەڕێوەبەرایەتیی ژمێرکاری و نە لە بەڕێوەبەرایەتیی خانەنشینی پێشمەرگە نییە، دەبێت ئەو بەڵگانە هەبن ئینجا مووچەکانیان خەرج دەکرێت".
سێ مانگە مووچەی خانەنشینی هێزەکانی 70ی پێشمەرگە لە کاتی خۆیدا دابەش ناکرێت.