یەک ئۆنسە زێڕ بە 2614 دۆلار مامەڵەی پێوەدەکرێت

 

رۆژی چوارشەممە، نرخی یەک ئۆنسە زێڕ دابەزی بۆ 2607 دۆلار کە کەمترین ئاستیەتی لە ماوەی سێ هەفتەی رابردوودا.

 

کاڵبوونەوەی چاوەڕوانییەکان بۆ کەمکردنەوەی سوودی بانکی لە ئەمریکا بەڕێژەی 0.5٪ لە کۆبوونەوەی داهاتووی بانکی ناوەندیی ئەو وڵاتە، بە هۆکاری سەرەکیی دابەزینی نرخی زێڕ هەژماردەکرێت.

 

تای وانگ، بازرگانی سەربەخۆی زێڕ لە نیویۆرک لەوبارەیەوە دەڵێت، "نرخی زێڕ ناتوانێت بەرەو بەرزبوونەوەی زیاتر بڕوات لە کورتمەودادا."

 

ئەو بازرگانە پێیوایە، "ئامارەکانی هەفتەی رابردووی بازاڕی کاری ئەمریکا، رەنگە بانکی ناوەندیی ئەمریکا ناچاربکات بە پلانی کەمکردنەوەی زۆری سوودی بانکی بچێتەوە."

 

بەهای دۆلار بەرامبەر بە دراوەکانی دیکە گەیشتووەتە بەرزترین ئاستی خۆی لە ماوەی دوو مانگی رابردوودا، ئەوەش گوشاری بۆ نرخی زێڕ هێناوە.