لە پەرلەمانی یەکێتیی ئەوروپا گفتوگۆ لەبارەی بەبازاڕکردنی بەرهەمی نێوخۆیی هەرێمی کوردستان دەکرێت

 

ئەمڕۆ پێنجشەممە، 09-02-2023، دلاوەر ئاژگەیی، نوێنەری حکومەتی هەرێمی کوردستان لە یەکێتیی ئەوروپا لەگەڵ مارکۆ کامپۆمینۆزی، پەرلەمانتاری ئیتاڵی و ئەڤین ئینجیر، پەرلەمانتاری سویدی لە پەرلەمانی ئەوروپا کۆبووەوە. دلاوەر ئاژگەیی بە رووداوی گوت، "لە کۆبوونەوەکەدا پوختەیەکم لەسەر دوایین پەرەسەندەکانی سیاسی نێوان هەرێمی کوردستان و عێراق خستەڕوو و باسی رێککەوتنی نێوان هەولێر و بەغدام کرد بۆ پێکهێنانی کابینەی نوێی حکومەتی عێراق لە سەر بناخەی هاوبەشی راستەقینە."

 

دلاوەر ئاژگەیی دەڵێت، لە کۆبوونەوەکەیاندا باسیان لە چارەسەرکردنی کێشەکانی نێوان هەولێر و بەغدا و کارکردن بۆ داڕشتنی یاسای نەوت و گاز و جێبەجێکردنی ماددەی 140 لە دەستووری عێراق کردووە. دەشڵێت، "باسمان لە بڕیارەکانی ئەم دواییەی دادگەی فیدراڵیی عێراق کرد کە زۆربەیان دژی هەرێمی کوردستان بوونە و کاریگەرییان لە سەر پرۆسەی سیاسی لە عێراق دروستکردووە و گرنگە پەرلەمانی ئەوروپا رۆڵی خۆی بۆ چارەسەرکردنی ئەو پرسە گرنگە بگێڕێت". 

 

نوێنەری حکومەتی هەرێمی کوردستان لە یەکێتیی ئەوروپا ئاماژەی بەوەکرد، لە بەشێکی دیکەی کۆبوونەوەکاندا، باسی پڕۆژە و کاری هاوبەش لەنێوان هەردوولا کراوە، بە تایبەت لە چوارچێوەی دیپلۆماسی کولتووری Cultural Diplomacy بە ئەنجامدانی چەند پڕۆژەیەک لە پەرلەمانی ئەوروپا، لەوانە پێشانگەیەکی تایبەت بە وێنەی شوێنە سرووشتی و مێژوویی و گەشتیارییەکانی هەرێمی کوردستان بۆ ئاشنابوونی زیاتری پەرلەمانتارانی ئەوروپا بە کوردستان. 

 

نوێنەری حکومەتی هەرێمی کوردستان لە یەکێتیی ئەوروپا داوای لە نوێنەری وڵاتانی یەکێتییەکە کرد کە وەبەرهێنان و هاوردە و هەناردە لەگەڵ هەرێمی کوردستان زیاد بکەن و گوتی، "هەرێمی کوردستان هەوڵی دۆزینەوەی بازاڕی ئەوروپی بۆ هەناردەکردنی بەرهەمە کشتوکاڵییەکانی دەدات لە داهاتوودا".

 

دلاوەر ئاژگەیی بڕیاری سەردانی شاندێکی یەکێتیی ئەوروپای بۆ هەرێمی کوردستان ئاشکرا کرد و گوتی، "لە سەرەتای مانگی 3ـی ئەمساڵ سەردانەکە دەکرێت".