ئەندامێکى لیژنەى دارایی: دوو بڕگەى پشکى هەرێمى کوردستان لە بودجە ناکۆکى لەسەرە

 

رۆژی 8ى حوزەیرانى 2023 موعین کازمى، ئەندامى لیژنەى دارایی پەرمانى عێراق بە تۆڕى میدیایی رووداوى راگەیاند، بەر لە کۆبوونەوەى پەرلەمانى عێراق لیژنەکەیان کۆدەبێتەوە و بەشێک لەو گۆڕانکاریانەیان پێگەیشتووە کە بەگوێرەى رێککەوتنە سیاسییەکان لەنێو پڕۆژەیاساى بودجەى گشتىدا کراون.

 

موعین کازمى گوتی "ئەوەى پەیوەندیی بە هەرێمى کوردستانەوە هەیە و چارەسەر نەکرابێت، دانەوەى پاشەکەوتى مووچە و رێگرى لە دەرهێنانى نەوتە لەلایەن حکومەتى هەرێمى کوردستانەوە لە کێڵگەکانى نەوتى کەرکووک و نەینەوا، پێشنیاز هەیە چۆنیێتى دانەوەى پاشەکەوتى مووچە وەک راسپاردە بدرێتە حکومەتى هەرێمى کوردستان، کە لە پشکەکەى بیداتەوە و لە پڕۆژەیاساى بودجەى گشتى بهێندرێتە دەرەوە. پرسی دەرهێنانى نەوتیش لە کێڵگەکانى کەرکووک و  نەینەوا دوابخرێت بۆ پەسندکردنى پڕۆژەیاساى نەوت و گاز و راسپاردەیەک هەبێت بۆ حکومەتى هەرێمى کوردستان، کە نابێت نەوت لە کەرکووک و نەینەوا هەناردەبکرێت بەبێ رەزامەندى حکومەت فیدراڵى".

 

بڕیارە کاژێر هەشتى ئەمشەو (8-6-2023)، پەرلەمانى عێراق کۆببێتەوە بۆ دەنگدان لەسەر پڕۆژەیاساى بودجەى گشتیى عێراق کە بۆ سێ ساڵە و قەبارەکەى نزیکەى 199 تریلیۆن دینارە.

 

موعین کازمى کە ئەندامى فراکسیۆنى چوارچێوەى هاوئاهەنگییە، گوتى "ئەوەى پەیوەندیدارە بە سکاڵاى پشکى پارێزگاکانى هەرێمى کوردستان کە لە گۆڕانکارییەکاندا کرابوون، پرسێکى نێوخۆیی کوردستانییە و  پەسندکرنى بودجەی لەسەر پەکناخەین".

 

رۆژی 25ـی ئایارى 2023، لیژنەى دارایی پەرلەمانى عێراق چەند گۆڕانکارییەکى لە هەردوو مادەى 13 و 14ـی پڕۆژەیاساى بودجەى گشتیى عێراقدا کرد، کە تایبەت بوون بە پشکى هەرێمى کوردستان و چەند کۆت و بەندێکیان بۆ ناردنى بودجە و رادەستکردنى نەوت و دانەوەى پاشەکەوتى مووچەى فەرمانبەران دانابوو.

 

پارتى پێشنیازی کردووە حکومەتى فیدراڵى قەرزى درێژخایەن بداتە حکومەتى هەرێمى کوردستان، بۆ ئەوەى مانگانە 10%ـی مووچە پاشکەوتکراوەکانی فەرمانبەرانی پێ بداتەوە.