نرخی نەوت بۆ کەمترین ئاستی خۆی لە سێ مانگی رابردوودا دابەزی

 

هۆکاری دابەزینی نرخی نەوت بۆ بڵاوبوونەوەی داتاکانی بازاڕی کاری ئەمریکا دەگەڕێتەوە کە ئاشکرای کرد، ئابووریی ئەمریکا لە مانگی ئابدا کەمتر لە ئاستی چاوەڕوانییەکان هەلیکاری نوێی رەخساندووە و بەرەو ساردبوونەوە رۆیشتووە.

 

یەک بەرمیل نەوتی برێنتی دەریای باکوور دۆلارێک و 63 سەنت دابەزی و بە 71 دۆلار و 6 سەنت مامەڵەی پێوەکرا.

 

نرخی یەک بەرمیل نەوتی سووکی تەکساسی ئەمریکاش دۆلارێک و 48 سەنت دابەزی و بە 67 دۆلار و 67 سەنت مامەڵەی پێوەکرا.

 

ئەو دابەزینەی نرخی نەوت کەمترین ئاستە لە مانگی حوزەیرانی ئەم ساڵ بەدواوە. 

 

لە ئاستی هەفتانەدا نرخی نەوتی برێنت بەڕێژەی 10% و نرخی نەوتی سووکی تەکساسی ئەمریکا بەڕێژەی 8% دابەزیون.

 

باب یاوگەر، بەڕێوەبەری بەشی وزە لە بانکی ژاپۆنی (میزۆهۆ) لەوبارەیەوە رایگەیاند: "جگە لە سستبوونەوەی بازاڕی کاری ئەمریکا، کەمبوونەوەی خواست لەلایەن چینەوە بۆ بەکارهێنانی نەوت، گوشاری لەسەر نرخەکانی نەوت داناوە."