بەهای دینار بەرامبەر بە دۆلار دابەزی

 

 

ئەمڕۆ لەکاتی داخستنی بازاڕدا لە هەولێر، بەهای دینار بەرامبەر بە دۆلار کەمێک دابەزی و 100 دۆلار بە 145 هەزار و 400 دینار مامەڵەی پێوەدەکرێت.

لەکاتی کردنەوەی بازاڕدا، 100 دۆلار بە 145 هەزار و 250 دینار بوو.

 

حاجی سابیر باواجی، ئەندامی ئەنجوومەنی گۆڕینەوەی دراوی هەولێر بۆ رووداو دەڵێت، ئەمڕۆ خواست لەسەر دۆلار زۆر بووە، بۆیە بەهای دینار کەمێک دابەزی، ئەوەش شتێکی ئاساییە.

 

لە بازاڕی دۆلارەکەی سلێمانیش دینار بە رێژەیەکی کەم دابەزی: 100 دۆلار لەکاتی کردنەوەدا بە 145 هەزار و 350 دینار و لەکاتی داخستنیشدا بە 145 هەزار و 550 دینار بووە.

 

رەوەز میرزا، ئاڵوگۆڕکاری دراو لە بازاڕی دۆلارەکەی سلێمانی بۆ رووداو دەڵێت، سەرەڕای دابەزینی بەهای دینار، بەڵام حەواڵە زۆرە.

 

بۆ حەواڵەکردن بازرگانان دەبێت دینار بخەنە سەر هەژمارەکانیان، ئەوەش وا دەکات دینار لە بازاڕ کەمببێتەوە و خستنەڕووی دۆلار زیاد دەبێت و خواست لەسەری کەمببێتەوە.

 

حاجی سابیر دەڵێت، لە هەولێریش دۆخەکە هاوشێوەیە و حەواڵەی بازرگانان زۆرە.

 

لە کۆتاییەکانی ئاداری ئەمساڵەوە بەهای دینار بەرامبەر بە دۆلار بەرزبووەتەوە و 100 دۆلار بە کەمتر لە 150 هەزار دینار مامەڵەی پێوە دەکرێت.

 

سەردانی محەممەد شیاع سوودانی، سەرۆکوەزیرانی عێراق بۆ ئەمریکا و کۆبوونەوەی لەگەڵ سەرۆک و بەرپرسانی وەزارەتی گەنجینەی وڵاتەکە، گەشبینییان لەبارەی لێكنزیکبوونەوەی هەردوو وڵات و هاوئاهەنگییان لەبارەی سیستمی بانکی دروستکرد.

 

هەردوولاش لیژنەیەکی هاوبەشیان بۆ پێداچوونەوە بە سزای سەر بانکە عێراقییەکان پێکهێنا.

 

لەدوای سەردانەکەوە، بانکی ناوەندیی عێراق خستنەڕووی دۆلاری زیادکردووە و رۆژانە زیاتر لە 250 ملیۆن دۆلار دەخاتە بازاڕەوە کە بەشی زۆری حەواڵەیە.

 

ئەمڕۆش بانکەکە 278 ملیۆن و 618 هەزار و 406 دۆلاری خستە بازاڕەوە؛ لەو بڕە، 253 ملیۆن و 58 هەزار و 406 دۆلاری بە شێوەی حەواڵە و 25 ملیۆن و 560 هەزار دۆلاریشی بە شێوەی کاش بووە.