وەزارەتی دارایی عێراق: رژدین لە گەرەنتیکردنی مووچەی مانگەکانی داهاتوو

 

 

لە راگەیێندراوێکدا کە ئەمڕۆ یەکشەممە 7ی نیسانی 2024 بڵاویکردووەتەوە، وەزارەتی دارایی عێراق دەڵێت، "وەزارەتی دارایی هەبوونی کۆبوونەوەی لەو جۆرە رەتدەکاتەوە، کە هەندێک کەس لە سۆشیال میدیا بانگەشەی بۆ دەکەن، بەتایبەت کۆبوونەوەی وەزیری دارایی و پارێزگاری بانکی ناوەندی و سەرۆکی یەکێک لە فراکسیۆنەکان بۆ تاوتوێکردنی زیادبوونی خەرجییەکانی حکومەت."

 

وەزارەتی دارایی عێراق دەڵێت، "وەزارەتی دارایی کە لەلایەن تەیف سامییەوە نوێنەرایەتی دەکرێت، بەپێی کارنامەی حکومەت کار دەکات و هیچ کۆبوونەوەیەکی لەو جۆرەی نەبووە."

 

لە راگەیێندراوەکەدا ئاماژە بەوەش کراوە، "جەخت لە رژدبوونمان لە گەرەنتیکردنی مافە داراییەکانی سەرجەم توێژەکانی کۆمەڵگە دەکەینەوە، ئەوەش لە رێگەی خەرجکردن و دابینکردنی مووچەی مانگەکانی داهاتووی سەرجەم دامەزراوەکانی دەوڵەت؛ هەروەها پارەی هیچ وەزارەتێک بۆ وەزارەتێکی دیکەش خەرج ناکرێت."

 

وەزارەتی دارایی عێراق ئاماژە بەوەش دەکات، پارەدارکردنی پڕۆژەکانی وەبەرهێنان لە پارێزگاکان و بەتایبەت پارێزگای بەسرە رانەگیراوە؛ دەشڵێت، "بەشی یەکەمی پارەی تەرخانکراو بۆ پڕۆژەکانی وەبەرهێنان خەرجکراوە، جگە لە داهاتی دەروازە سنوورییەکانی پارێزگای بەسرە و ئەوەش بەپێی رێنوێنییەکانی سەرۆکوەزیرانی عێراق لەسەروبەندی دیدارەکەی لەگەڵ پارێزگارەکان لە کۆبوونەوەی ئەنجوومەنی هاوئاهەنگیی نێوان پارێزگاکان بووە."

 

راگەیێندراوەکە لە کاتێکدایە، لە چەند رۆژی رابردوودا لە هەندێک لە تۆڕەکانی سۆشیاڵ میدیا بڵاوکرایەوە  کە گوایە بەشێک لە بودجەی پارێزگای بەسرە دراوە بە شوێنی دیکە و بەشێک لە پڕۆژەکانی ئەو پارێزگایە وەستاون.