رووداو دیجیتاڵ
وەزیری نەوتی عێراق رایگەیاند، وڵاتەکەی رۆژانە پێنج ملیۆن بەرمیل نەوت بەرهەمدەهێنێت و لە ریزبەندی 12یەم گەورەترین وڵاتە لە گازی یەدەگ. دەشڵێت، "رۆژانە 38٪ـی گازی بەرهەمهاتووی عێراق دەسووتێت."
حەیان عەبدولغەنی، وەزیری نەوتی عێراق، لە هەڤپەیڤینێکدا لەگەڵ ئاژانسی فەرمیی عێراق رایگەیاند، ئاستی بەرهەمهێنانی نەوتی عێراق بەرزبووەتەوە و گەیشتووەتە پێنج ملیۆن بەرمیل لە رۆژێکدا. تایبەت بە گازیش دەڵێت، "عێراق بەتایبەت لە ناوچەکانی رۆژئاوای وڵاتەکە، بڕێکی زۆری گازی هەیە و بەنیازە لەرێگەی 15 ناوچەوە وەبەرهێنانی تێدا بکات."
ئاماژەی بەوەشکرد، "ژمارەیەک پڕۆژەش لە پارێزگاکانی زیقار، بەسرە و میسان بۆ وەبەرهێنانی بڕی 900 ملیۆن پێ سێجا هەیە، جگە لە 600 ملیۆن پێ سێجا کە لەرێگەی کۆمپانیای تۆتاڵی فەڕەنسییەوە وەبەرهێنان دەکرێت."
وەزیری نەوت ئاماژە بۆ بایەخی نەوت لەسەر داهاتووی ئابووریی عێراق دەکات و بە پێویستیشی دەزانێت سەرچاوەی داهات و ئابووریی عێراق فرەچەشن بکرێت.
حەیان عەبدولغەنی، ئاماژەی بەوەشکرد، وەزارەتەکەی پلانی بۆ زیادکردنی وەبەرهێنان لە گازی سرووشتی هەیە و گەڕە نوێیەکانی گرێبەستەکانیان جەخت لەسەر ئەو سامانە سرووشتییە دەکاتەوە، بەتایبەت لە وەبەرهێنان لە گازی هاوەڵ.
راشیگەیاندووە، "عێراق لە گەڕی پێنجەم و شەشەمی گرێبەستەکانی نەوتی 30 کێڵگەی و ناوچەی نەوتی و گازیی تەرخانکراون بۆ ئەوەی وەبەرهێنانیان تێدا بکرێت."
وەزیری نەوت بای وەبەرهێنانکردن لە 15 ناوچەی گازی لە ناوچەکانی رۆژئاوای عێراق لە سنووری نێوان سووریا و عێراق و پاشان عێراق و ئوردن تا دەگاتە سنوور لەگەڵ سعودیە لە پارێزگاکانی دیوانییە و موسەننا دەکات.
باسی ئەوەشدەکات 20 کۆمپانیای جیهانی رۆڵیان لە پڕۆسەی وەبەرهێنان لە گازدا هەیە و دەڵێت، "گرێبەستەکانی نەوت و گاز دەبێتە هۆی گەیشتن بە خودبژێوی و راگرتنی هاوردەکردنی گاز و رەنگە عێراق بکاتە وڵاتێکی هەناردەکاری گاز."
وەزیری نەوتی عێراق ئاشکرای دەکات، وڵاتەکەی رۆژانە 3200 ملیۆن پێ سێجای گاز بەرهەمدەهێنێت، 62٪ـی وەبەردەهێندرێت و 38٪ـی دەسووتێت، هەوڵی عێراق بۆ راگرتنی سووتانی گاز (بەفیڕۆچوون) بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ