وەزارەتی دارایی: TBI یەکەمین کۆمەڵەی کارتە بانکییەکانی رادەستی تیمی 'هەژماری من' کرد

رووداو دیجیتاڵ

وەزارەتی دارایی حکومەتی هەرێمی کوردستان رایگەیاند، بانکی عێراقی بۆ بازرگانی (TBI) یەکەمین کۆمەڵەی کارتە بانکییەکانی رادەستی تیمی "هەژماری من" کرد.

بەپێی راگەیێندراوێکی وەزارەتی دارایی و ئابووریی هەرێمی کوردستان، رۆژی سێشەممە 4ی حوزەیرانی 2024 لە چوارچێوەی پرۆسەی بەبانکیکردنی مووچەی فەرمانبەرانی هەرێمی کوردستان لە رێگەی پرۆژەی "هەژماری من،" بانکی عێراقی بۆ بازرگانی (TBI) هەڵساوە بە رادەستکردنی یەکەمین کۆمەڵەی کارتە بانکییەکان بە تیمی پڕۆژەکە، کە پێکهاتووە لە کارتی بانکی 368 فەرمانبەری سەرجەم وەزارەتەکانی حکومەتی هەرێمی کوردستان.

 

وەکو لە راگەیێندراوەکەدا هاتووە، حکومەتی هەرێمی کوردستان "بە پەرۆشەوە چاوەڕێی وەرگرتنی کارتە چاپکراوەکانی دیکەی بانکەکەیە بۆ ئەو فەرمانبەرانەی کە بانکی ناوبراویان هەڵبژاردبوو لە چوارچێوەی پڕۆژەی (هەژماری من) و لە ماوەی هەفتەکانی رابردوو زانیارییەکانیان بۆ بانکی ناوبراو نێردرابوو، تاوەکو بە زووترین کات بتوانێت کارتەکان رادەستی فەرمانبەرانی خوازیار بکات."

وەزارەتەکە هیوای خواستووە کە سەرجەم مووچەخۆران بەردەوام بن لە تۆمارکردنی خۆیان لە پرۆسەی بەبانکیکردن لەڕێگەی هەڵبژاردنی یەکێک لەو حەوت بانکانەی کە ئێستا لە پڕۆژەی "هەژماری من"دا بەردەستن.