رووداو دیجیتاڵ
نرخی دینار بەرامبەر بە دۆلار دابەزی و ئەمڕۆ لەکاتی داخستندا جارێکی دیکە نرخی 100 دۆلار گەیشتەوە سەرووی 150 هەزار دینار.
دوێنێ یەکشەممە، حاجی سابیر باواجی، ئەندامی ئەنجوومەنی گۆڕینەوەی دراوی هەولێر بە رووداوی راگەیاند، 100 دۆلار لەکاتی داخستندا بە 149 هەزار و 700 دینار مامەڵەی پێوەکراوە. ئەمە بەرزترین ئاستی نرخی دینار بووە بەرامبەر بە دۆلار لە ئەم ساڵدا تۆمارکرابێت.
بەڵام ئەمڕۆ دۆخەکە پێچەوانە بووەوە؛ 100 دۆلار لەکاتی کردنەوەدا بە 149 هەزار و 500 دینار بووە، بەڵام لەکاتی داخستندا نرخی دینار جارێکی دیکە دابەزی و 100 دۆلار بە 150 هەزار و 200 دینار مامەڵەی پێوەکرا.
هاوکات لە بازاڕی دۆلارەکەی سلێمانیش، نرخی 100 دۆلار لەکاتی کردنەوەدا بە 149 هەزار و 800 دینار و، لەکاتی داخستنیشدا بە 150 هەزار و 250 دینار بووە.
ئەمڕۆ د. سەفوان قوسەی، راوێژکاری کۆمەڵەی بانکە تایبەتەکانی عێراق بە رووداوی راگەیاند: هۆکاری بەرزبوونەوەی ئەم ماوەیەی نرخی دینار دەگەڕێتەوە بۆ کەمبوونەوەی مامەڵەی بازرگانیی عێراق لەگەڵ چین، کە ساڵانە قەبارەی بازرگانیی نێوانیان دەگاتە نزیکەی 14 بۆ 17 ملیار دۆلار.
وەک د. سەفوان دەڵێت، لە مانگی شوباتدا لە چین، چەند پشوویەک هەن، بەوەش بازرگانان کەمتر کاڵا لە چینەوە هاوردە دەکەن و خواست بۆ دۆلار لە عێراق و هەرێمی کوردستان کەم دەبێتەوە.
هاوکات ئەمڕۆ بانکی ناوەندیی عێراق بەراورد بە دوێنێ، فرۆشی دۆلاری بەشێوەی کاش بە بڕی زیاتر لە 20 ملیۆن دۆلار کەمکردەوە؛ ئەمڕۆ بانکی ناوەندیی عێراق 208 ملیۆن و 386 هەزار و 184 دۆلاری خستە بازاڕەوە؛ لەو بڕە 193 ملیۆن و 796 هەزار و 184 دۆلاری بەشێوەی کاش و، 14 ملیۆن و 590 هەزار دۆلاریشی بەشێوەی کاش بووە.
رۆژی 31-01-2024، فالح داوود، بریکاری پێشووی بانکی ناوەندیی عێراق بە رووداوی گوت، تاوەکو مانگی شەش (حوزەیران)ـی ئەم ساڵ، نرخی دینار لە بەرامبەر دۆلاری ئەمریکی بەرز دەبێتەوە.
فالح داوود گوتی، پشتبەستن بە سەکۆی ئەلیکترۆنی کاریگەرییەکی ئەرێنیی لاوەکیی هەبووە لەم نێوەندەدا لەسەر نرخی دینار بەرامبەر دۆلار و نیمچە سەقامگیرییەکی لە نرخی دینار دروستکردووە و رەنگە تاوەکو مانگی شەشی ئەم ساڵ، نرخی دینار کەمێکی دیکە بەرزببێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ