وەزارەتی نەوتی عێراق: رژدین لەسەر هەناردەکردنەوەی نەوتی کوردستان لە رێگەی بەندەری جەیهانەوە

 

 

عاسم جیهاد، گوتەبێژی وەزارەتی نەوتی عێراق لەبارەی هەناردەکردنەوەی نەوتی هەرێمی کوردستان لە رێگەی بەندەری جەیهانەوە بە میدیای فەرمیی عێراقی راگەیاند، "حکومەتی عێراق رژدە لەسەر هەناردەکردنەوەی نەوت لە رێگەی بەندەری جەیهانی تورکیاوە و هەوڵی جیدی دەدات بۆ چارەسەرکردنی کێشە یاسایی، تەکنیکی و داراییەکانی تایبەت بە بابەتی ئەو گرێبەستانەی لەلایەن هەرێمی کوردستانەوە لەگەڵ کۆمپانیا جیهانییەکان کراون، چونکە ئەو گرێبەستانە جیاوازن لەو گرێبەستانەی حکومەتی عێراق یان وەزارەتی نەوت دەیانکات؛ بەو پێیە پێویستە شێوازی یاسایی ئەو گرێبەستانە بگۆڕدرێت و لەگەڵ ئەو گرێبەستانەی وەزارەتی نەوت دەیانکات بگونجێن."

 

عاسم جیهاد گوتیشی، "چارەسەرکردنی ئەو کێشانە پێویستە لەگەڵ یاسا و رێنوێنییەکان بگونجێت بۆئەوەی پەلە لە هەناردەکردنەوەی نەوت بکرێت، چونکە لە هەناردەکردنەکەدا بەپێی یاسای بودجە شایستەی دارایی لایەنەکانی تێدایە."

 

گوتەبێژەکەی وەزارەتی نەوتی عێراق گوتیشی، "حکومەتی عێراق رژدە لەسەر ئەوەی ئەو پڕۆسەیە بە شێوەیەکی یاسایی و دروست رێکبخات لەپێناو پەلەکردن لە هەناردەکردنەوەی نەوتی عێراق لە رێگەی بەندەری جەیهانی تورکیاوە."

 

لە 25ی ئادارەوە و بە کاریگەریی بڕیاری دەستەی نێوبژیوانیی پاریس، هەناردەکردنی نەوتی کوردستان راگیراوە. بەپێی رەشنووسی بودجەی عێراق، دەبێت هەرێمی کوردستان رۆژانە 400 هەزار بەرمیل نەوت هەناردە بکات یان بداتە وەزارەتی نەوتی عێراق، بەو پێیە زیانەکانی راگرتنی هەناردەی نەوتی کوردستان دەگاتە هەشت ملیار دۆلار.

 

عاسم جیهاد گوتیشی، "عێراق لە ماوەی چەند مانگی رابردوودا مانگانە لەنێوان 7 بۆ 9 ملیار دۆلار داهاتی هەبووە کە زۆرترین بووە و رۆژانە بڕی 3 ملیۆن و 200 بۆ 3 ملیۆن و 400 هەزار بەرمیل هەناردەی هەبووە؛ ئەو داهاتە زۆرەش بەهۆی سەقامگیریی بازاڕەکانەوە بووە. ئەو داهاتە زۆرە بەهۆی هاوئاهەنگی لەگەڵ کۆمەڵەی ئۆپێک پڵەسەوە بەدەستهاتووە و ئەو هاوئاهەنگییە بەردەوام دەبێت."