نەرمین مەعرووف: مووچەی فەرمانبەرانی هەرێمی کوردستان لە بودجەدا مسۆگەر کراوە

 

 

رۆژی دووشەممە 3ی حوزەیرانی 2024 د. نەرمین مەعرووف، ئەندامی لیژنەی دارایی پەرلەمانی عێراق بە هەڵکەوت عەزیز، پەیامنێری رووداو لە بەغدای راگەیاند، "زیاتر لە 11 تریلیۆن و 500 ملیار دینار تەرخان کراوە بۆ مووچەی فەرمانبەرانی هەرێمی کوردستان کە مانگانە نزیکەی 965 ملیار دینار دەکات، ئەو بڕە تەرخانکراوەش بۆ ئەو مووچەخۆرانەیە کە ئێستا مووچە وەردەگرن و ناویان لە لیستی مووچەخۆرانی هەرێمی کوردستانە، واتە فەرمانبەران، خانەنشینان، تۆڕی چاودێریی کۆمەڵایەتی."

 

ئەو ئەندامەی لیژنەی دارایی پەرلەمانی عێراق گوتیشی، "ئەوەی لەم خشتەیەدا بەلامانەوە خاڵێکی گرنگە، پرسی مووچە و شایستەی مووچەخۆرانی هەرێمی کوردستانە، کە لە بودجەی 2024دا بە تەواوەتی مسۆگەر کراوە."

 

لەگەڵ پەسندکردنی بودجەی 2024ی عێراق، پەرلەمان دەسەڵاتی گواستنەوەی دوو ترلیۆن دیناری دایە ئەنجوومەنی وەزیران، بە گوتەی د. نەرمین مەعرووف، ئەوە پێشنیازی فراکسیۆنەکانی دەرەوەی هەرێمی کوردستان بوو، "ئەو بڕە پارەیەی بۆ وەبەرهێنانی پارێزگاکان تەرخانکرابوو، سێ ترلیۆن دینار بوو کە ناڕەزایەتی فراکسیۆنەکانی لێکەوتەوە و داوایان کرد زیاد بکرێت، لە بەرامبەر پەسند کردنی تەواوی خشتەکانی بودجە، پێشنیاز کرا دەسەڵات بدرێتە ئەنجوومەنی وەزیران بۆئەوەی دوو ترلیۆن دینار بخاتە سەر بودجەی وەبەرهێنانی 15 پارێزگاکەی دەرەوەی هەرێمی کوردستان."

 

ئەو ئەندامەی لیژنەی دارایی پەرلەمانی عێراق دووپاتی دەکاتەوە، "سەرۆکوەزیران ناتوانێت لەو دوو ترلیۆن دینارە هیچ بڕە پارەیەک بۆ هەرێمی کوردستان تەرخان بکات، لەبەر ئەوەی لە دەقەکەدا نووسراوە بۆ هەموو پارێزگاکان جگە لە هەرێمی کوردستان."

 

لەبەر ئەوەی بودجە لە ساڵی 2023 پەسند کراوە، ئەم ساڵ تەنیا خشتەی بودجە رەوانەی پەرلەمان کراوە. نەرمین مەعرووف گوتی، "ناکرێت دەستکاریی یاساکانی بکرێت، بۆیە لە بودجەی ئەم ساڵ هیچ دامەزراندنێک بۆ عێراق و هەرێمی کوردستان نییە و ئەو توێژانەی لە هەرێمی کوردستان داوای دامەزراندنیان دەکرد، دەرفەتی ئەوە لە خشتەکەدا نەبوو هیچیان بۆ بکرێت." گوتیشی، "تەنیا بڕیارێک هەیە کە ئەنجوومەنی وەزیران بەپێی یاسای ژمارە 60ی یاسای بودجە، دەسەڵاتی هەیە بۆ قەرەبووی فەرمانبەران پارە لە شوێنێکەوە بۆ شوێنێکی دیکە بگوازێتەوە یان زیادی بکات."

 

لەبارەی دامەزراندنی یەکەم و دووەم و سێیەمی زانکۆکانی هەرێمی کوردستان د. نەرمین مەعرووف گوتی، "هیوامان وایە لەسەر ئەو دەسەڵاتەی دراوەتە ئەنجوومەنی وەزیران بۆ قەرەبووی فەرمانبەران، پارە بۆ ئەو مەبەستە بگوازێتەوە و دوای ئەوەی زانیاریی تەواوی ئەم توێژە گەیشتە وەزارەتی دارایی عێراق، بە دەسەڵاتی ئەنجوومەنی وەزیران پارەی پێویستیان بۆ تەرخان بکرێت، لەگەڵ ئەوانەش بۆ هەموارکردنەوەی مووچەی خانەنشینان، پلە بەرزکردنەوە و بەگرێبەستکردنی وانەبێژان، ئەنجوومەنی وەزیران پارە تەرخانبکات."

 

بودجەى عێراق بۆ 2024 زیاتر لە 211 تریلیۆن دینارە کە نزیکەى 12 تریلیۆن دینارى بەراورد بە ساڵى 2023 زیاتر بووە. لەو بڕە پارەیە 20.9 تریلیۆن دینارى پشکى هەرێمى کوردستانە بۆ ساڵێک، کە 11 ترلیۆن و 500 ملیار دینارى بۆ مووچەیە.