رووداو-هەولێر
وەزیری نەوتی عێراق دەڵێت، رێکارەکانی رادەستکردنی نەوتی هەرێمی کوردستان بە کۆمپانیای بەبازاڕکردنی نەوتی عێراق (سۆمۆ) دەستی پێکرد. دەشڵێت، ئەو قەرزانەی لەسەر هەرێمی کوردستانن رێکەوتنیان لەسەر دەکرێت.
حەیان عەبدولغەنی، وەزیری نەوتی عێراق، ئەمڕۆ دووشەممە، 03-02-2025، بە میدیای فەرمیی عێراقی گوت: "وەزارەتی نەوت، جووڵەکانی لەگەڵ حکومەتی هەرێمی کوردستان دەستپێکرد و نووسراوی فەرمی بۆ کردووە بۆ ئەوەی نەوت رادەستی کۆمپانیای سۆمۆ بکات".
وەزیری نەوتی عێراق جەختیکردەوە، حکومەتی فیدراڵی بەرهەمی نەوتی هەرێمی کوردستان وەردەگرێت بۆ ئەوەی لەڕێگەی کۆمپانیای نیشتمانییەوە هەناردەی بکات.
وەزیری نەوت گوتی: "لەگەڵ حکومەتی تورکیا رێکار هەن، بۆ ئامادەکردنی هێڵی بۆریی عێراق - تورکیا بە مەبەستی هەناردەکردنی نەوت لە رێگەی بەندەری جەیهانەوە".
بەگوتەی حەیان عەبدولغەنی "ئەو بڕە نەوتەی کە هەرێمی کوردستان رادەستی وەزارەتی نەوتی دەکات بۆ ئەوەی لەڕێگەی بۆریی عێراق-تورکیاوە هەناردە بکرێت لە 300 هەزار بەرمیل نەوت کەمتر نابێت".
هەروەها ئاماژەی بەوەشدا: "ئەو قەرزانەی لەسەر هەرێمی کوردستانن لە نێوان هەردوولا رێکەوتنیان لەسەر دەکرێت".
پەرلەمانی عێراق، دوێنێ یەکشەممە 02-02-2025، هەمواری یاسای بودجەی سێ ساڵەی 2023 و 2024 و 2025ی پەسندکرد، کە مادەی 12ی تایبەت بە دۆسیەی بەرهەمهێنان و گواستنەوەی نەوتی هەرێمی کوردستان بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ