رووداو- هەولێر
وەزارەتی نەوتی عێراق رایگەیاند، قەبارەی نەوتی خاوی هەناردەكراوی عێراق لە مانگی ئەیلولی رابردوو گەیشتە زۆرتر لە 76 ملیۆن بەرمیل نەوت و داهاتی ئەو نەوتەش گەیشتە 7 ملیار دۆلار.
عاسم جیهاد، گوتەبێژی وەزارەتی نەوتی عێراق لە لێدوانێكی رۆژنامەوانیدا رایگەیاند: "بەپێی داتاكانی كۆمپانیای بە بازاڕكردنی نەوتی عێراق (سۆمۆ)، قەبارەی نەوتی خاوی هەناردەكراوی عێراق لە مانگی ئەیلوولی رابردوو گەیشتە 76 ملیۆن و 250 هەزار بەرمیل نەوت و داهاتی ئەو نەوتەش گەیشتە 7 ملیار دۆلار".
عاسم جیهاد گوتیشی "رێژەی نێوەندیی هەناردەكردنی نەوتی عێراق لە مانگی رابردوو لە رێگەی بەندەرەكانی بەسرە لە باشووری عێراق، گەیشتە 2 ملیۆن و 542 هەزار بەرمیل لە رۆژێكدا".
گوتەبێژی وەزارەتی نەوتی عێراق ئاماژەی بەوەشدا، كە "بەهۆی هێرشە تیرۆریستییەكانەوە، هەناردەكردنی نەوتی كەركووك بە رێگەی بۆری گواستنەوەی نەوتی كەركووك-جیهان لە مانگی ئاداری رابردووەوە تا ئێستا وەستاوە".
ئەمە لەكاتێكدایە بەهۆی كۆنترۆڵكردنی سێ یەكی رووبەری خاكی عێراق لەلایەن چەكدارانی داعشەوە و هەناردەنەكردنی نەوتی كەركووك، هەناردەكردنی نەوتی عێراق بەشێوەیەكی بەرچاو دابەزیوە، كاریگەرییەکانی ئەو دابەزینەش راستەوخۆ لەسەر بودجەی فیدراڵی دەركەوتووە، بەشێوەیەك پسپۆرانی ئابووری دەڵێن، بودجەی فیدراڵی 2014ـی عێراق، كورتدەهێنێ.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ