محەممەد شیاع سوودانی: بەشێک لە پشکی بودجەی هەرێمی کوردستانمان نارد

 

محەممەد شیاع سوودانی، سەرۆکوەزیرانی عێراق ئەمڕۆ (سێشەممە، 1-8-2023) دوای کۆبوونەوەی ئەنجوومەنی وەزیرانی عێراق قسەی بۆ رۆژنامەڤانان کرد. لەبارەی مووچەی فەرمانبەرانی هەرێمی کوردستانەوە گوتی بەشێک لە پشکی هەرێمی کوردستانیان لە بودجەدا ناردووە و ئاماژەی بەوەشکرد، ناردنی پارەکە لە چوارچێوەی یاسای بودجەی گشتیی عێراقدایە. 

 

تایبەت بە دابەشکردنی مووچە لە هەرێمی کوردستان، سەرچاوەیەک لە وەزارەتی دارایی هەرێمی کوردستان بە رووداوی گوت، تاوەکو ئێستا هیچ پارەیەک نەنێردراوە و هەر کات گەیشت، دەست بە دابەشکردنی مووچەی مانگی حوزەیران دەکەن.

 

لەبارەی ئەوەی کە پەیوەندی بە جێبەجێکردنی رێککەوتنی نێوان هەولێر و بەغداوە هەیە، محەممەد شیاع سوودانی گوتی، " رێککەوتنمان لەگەڵ هەرێمی کوردستان هەیە و لیژنەش لە هەردوولا پێکهێندراوە بۆ چاودێریکردنی رێککەوتنەکە."

 

بەشێکی رێککەوتنی نێوان هەولێر و بەغدا تایبەتە بە نەوت و، دەبێت حکومەتی هەرێمی کوردستان رۆژانە 400 هەزار بەرمیل نەوت رادەستی وەزارەتی نەوتی عێراق بکات بۆ ئەوەی هەناردەی دەرەوە بکرێت، یان لە نێوخۆدا بەکاربهێندرێت. 

 

محەممەد شیاع سوودانی لەو بارەوە گوتی، تاوەکو ئێستا هەناردەکردنەوەی نەوتی هەرێمی کوردستان بۆ دەرەوە دەستی پێنەکردووەتەوە و گوتیشی، "رۆژانە 55 هەزار بەرمیل لە هەرێمی کوردستان وەردەگرن".