رووداو دیجیتاڵ
نرخی یەک ئۆنسە زێڕ ئەمڕۆ لە دوای کردنەوەی بازاڕەکانی ئاسیا، ئاستێکی نوێی پێوانەیی تۆمارکرد و بە 3144 دۆلار مامەڵەی پێوەکرا.
بەرزبوونەوەی نرخی زێڕ بەپێی شرۆڤەکاران، بەهۆی نادڵنیایی پەیوەست بە پێناسە گومرگییە پێچەوانەکانی دۆناڵد ترەمپ، سەرۆکی ئەمریکا روویداوە، کە بڕیارە لە رۆژی چوارشەممەوە رابگەیەیێندرێت.
نرخی یەک ئۆنسە زێڕ ئەمڕۆ (سێشەممە، 1-4-2025) 24 دۆلاری دیکە بەرزبووەوە. جگە لە پێناسە گومرگییەکان، تەشەنەکردنی مەترسییە جیۆسییاسییەکان لە بازاڕەکان، خواستی بۆ کڕینی زێڕ بەرزکردووەتەوە.
دەیڤید میگەر، بەڕێوەبەری بەشی کانزاکان لە کۆمپانیای راوێژکاریی (های ریج فیوچەرز) لەو بارەیەوە رایگەیاند، "ناڕوونییەکانی پەیوەست بە پێناسە گومرگییەکانی دۆناڵد ترەمپ، خواستی بۆ کڕینی زێڕ بەرزکردووەتەوە کە بە بەردەوامی وەک سامانێکی سەلامەت بۆ وەبەرهێنان هەژماردەکرێت لە کاتی دڵەڕاوکێ و بێ متمانەیی لەنێو بازاڕەکاندا."
ئەو شرۆڤەکارە پێیوایە؛ هەندێ ئاستی دیاریکراو هەن کە دەتوانن پاشەکشە بە نرخی زێڕ بکەن بەهۆی کۆکردنەوەی قازانج، بەڵام ئێستا بنەمای بازاڕی زێڕ بەهێزەوە ئاراستەکەی بەرەو بەرزبوونەوەیە.
چاوەڕوان دەکرێت، دۆناڵد ترەمپ رۆژی چوارشەممە پێناسە گومرگییە پێچەوانەکان رابگەیەنێت، واتا هەر وڵاتێک پێشتر گومرگری بەسەر هاوردەکردنی کاڵای ئەمریکیدا سەپاندبێت، لەبەرامبەردا ترەمپ گومرگ بەسەر هاوردەکردنی کاڵاکانی ئەو وڵاتانە بۆ ئەمریکا دەسەپێنێت.
هاوکات، پێناسی گومرگی سەر هاوردەکردنی ئۆتۆمبێل لە رۆژی پێنجشەممە، 3 ـی ئەم مانگە دەڕواتە بواری جێبەجێکردنەوە.
نرخی زێڕ لەمساڵدا نزیکەی 20٪ بەرزبووەتەوە، ساڵی 2024ـیشدا بەڕێژەی 27٪ بەرزبوونەوەی بەخۆیەوە بینیبوو.
شرۆڤەکاران پێیانوایە لەڕووی تەکنیکییەوە، نرخی زێڕ لە ڕادەبەدەر بەرزبووەتەوە و لە ئاستێکدایە کە ئەگەری دابەزینی لێدەکرێت، بەڵام کڕیاران و بازرگانان گوێیان لەو ئاماژە تەکنیکییانە نییە و بەردەوامن لە کڕینی زێڕ.
نرخی یەک مسقاڵ زێڕی عەیار 21 کە زێڕی دڵخوازی هاونیشتمانییانە، دوێنێ لە بازاڕەکانی هەرێمی کوردستان گەیشتە 645 هەزار دینار، بۆیە چاوەڕوان دەکرێت ئەمڕۆ لەکاتی کردنەوەی بازاڕەکانی هەرێمی کوردستان دا، نرخی بەرزتریش ببێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ