بەرهەمی ساڵانەی ماسی لە هەرێمی کوردستان زیاتر لە 6000 تۆنە

 

رۆژی چوارشەممە، 1-2-2023، سیروان سەعید، بەڕێوەبەری سامانی ماسی لە وەزارەتی کشتوکاڵی هەرێمی کوردستان بە تۆڕی میدیایی رووداوی گوت: "بەرهەمی ساڵانەی ماسی لە هەرێمی کوردستان 6 بۆ 7 هەزار تۆنە، بەڵام خواستی ساڵانە دەگاتە 12 هەزار تۆن، ئەوەی دەمێنێتەوە هاوردە دەکرێت، کە زۆرترینیشی لە ئێرانەوە دەهێندرێت".

 

ئێستا نرخی کیلۆیەک ماسی لە هەرێمی کوردستان بە نزیکەی 7 هەزار دینارە؛ بەڕێوەبەری سامانی ماسی لە وەزارەتی کشتوکاڵ دەڵێت: "نرخەکە بەرزە و هۆکاریش ئەوەیە کە زۆرینەی ماسی هاوردەکراو لە ئێرانەوەیە و لەوێش نرخی بەرزبووەتەوە".

 

کاتی پێگەیشتنی ماسی لەنێوخۆدا مانگەکانی ئاب و ئەیلوولە؛ ئێستا کۆتایی فرۆشتنی بەرهەمی پێگەیشتووی ماسییە. زۆرترین ماسی لە هەرێمی کوردستان لە پارێزگاکانی هەولێر و سلێمانی بەرهەم دەهێندرێت، بەڵام بە گوتەی سیروان سەعید، پڕۆژەیەکی گەورەی بەرهەمهێنانی ماسی لە دهۆک لە دامەزراندندایە و بە تەواوبوونی پڕۆژەکە پێویستیان بە هاوردەکردن نامێنێت.

 

پڕۆژەی بەرهەمهێنانی ماسی لە دهۆک گەورەترین پڕۆژەی بەرهەمی ماسی دەبێت لە عێراق و هەرێمی کوردستان، پڕۆژەکە لە قۆناخی یەكەمیدا دەتوانێت لە ساڵێکدا 21 ملیۆن پەنجە ماسی و هەزار و 200 تۆن گۆشتی ماسی بەرهەم بهێنێت؛ بەڕێوەبەری سامانی ماسی لە وەزارەتی کشتوکاڵ گوتی: "بە تەواوبوون و بەتەواویی کارکردنی پڕۆژەکە، کە 65%ـی کارەکانی تەواو بووە، هەرێمی کوردستان پێویستی بە هاوردەکردنی ماسی نامێنێت و بەشی نێوخۆ بەرهەممان دەبێت".

 

دوو جۆر پڕۆژەی بەخێوکردنی ماسی لە هەرێمی کوردستاندا هەن؛ ئەوانەی مۆڵەتی فەرمییان هەیە و ئەوانەی بێ مۆڵەتن؛ ئەوانەی مۆڵەتی فەرمیی وەزارەتی کشتوکاڵی هەرێمی کوردستانیان هەیە، زیاتر لە 400 پڕۆژەن و بەرهەمەکەیان ساڵانە زیاترە لە سێ هەزار و 200 تۆن، ئەوانەش مۆڵەتیان نییە بەرهەمەکەیان هێندەی ئەوانەیە کە مۆڵەتیان هەیە.