کۆڵبەرێکی تەمەن 26 ساڵان بە تەقەی هێزەکانی پاسەوانی سنوور لە گوندی سەرگەتی هەورامان، لە سنووری هەڵەبجە کوژرا.

ئەندامێکی لیژنەی یاسایی پەرلەمانی عێراق بە رووداوی راگەیاند، دەبێت لەدوای 30ی تشرینى دووەمى 2023وە، هاوشێوەی بریکارەکانی وەزارەت، کۆتایی بە دەسەڵاتی پارێزگارە بەوەکالەتەکانیش بهێندرێت. ئاماژە بەوەش دەکات، "ناکۆکییەکانی نێوماڵی کورد گوێزراونەتەوە بۆ بەغدا و بەو هۆیەوە ژمارەیەک پۆستی کورد بە بەتاڵی ماونەتەوە."

دیمەن زەندی، کچە کوردی خەڵکی سنەی رۆژهەڵاتی کوردستان، کە وەکو یەکەم خانمی کورد لە فێستیڤاڵێکی نێودەوڵەتیی فیلمی هیندستان بە جلی کوردییەوە بەشداریی کرد، رایگەیاند، دەبێت هونەرمەند لە رێگەی هونەرەکەیەوە پێناسەی نەتەوەکەی بکات. دەشڵێت، "دەبێت سینەمای کوردی ئەستێرە دروست بکات."

شارەزایەکی کاروباری هەڵبژاردن دەڵێت، 60٪ـی هاووڵاتییانی عێراق کارتی بایۆمەترییان وەرگرتووەتەوە، ئاماژە بەوەش دەکات، چاوەڕێ دەکرێت تەنیا 25٪ـی خەڵک بەشداری لە هەڵبژاردنی ئەنجوومەنی پارێزگاکانی عێراق بکەن.

جێگری سەرۆکی زانکۆی کوردستان - هەولێر رایگەیاند، خوێندکارانیان لە نیوەی ساڵی خوێندنەکەیان هەلیکاریان دەستدەکەوێت، بە گشتی 95٪ـی دەرچووانیان خاوەن کارن و دامەزراون. دەشڵێت: "خوێندکارانی ئێمە ئەو دەرفەتەیان هەیە، بەشێکی خوێندنەکەیان لە دەرەوە تەواو بکەن."

عەلی عەللاق، پارێزگاری بانکی ناوەندیی عێراق لەبارەی پرسی دینار و دۆلار لە هەولێرە. سەرۆکی ئەنجوومەنی بازاڕی دراوی هەولێر دەڵێت، پێیگوتوون، کەمیی خستنەڕووی دۆلار بە کاش، لەپێناو رێگرییە لە بەقاچاخبردنی بۆ دەرەوە. دەشڵێت: "عەلی عەللاق گوتی، هەموو مامەڵە داراییەکان دەکەینە دینار."

راوێژکارێکی سەرۆککۆماری عێراق رایگەیاند، نوێنەری تایبەتی سەرۆککۆماری تورکیا بۆ پرسی ئاو سەردانی بەغدای کردووە، بەڵام ئەوان ئامادە نین لەبارەی بەردانەوەی ئاو بۆ رووباری دیجلە رێککەوتن بکەن. دەشڵێت، "لەنێوان هەولێر و بەغدا پێشنیازێک کراوە، چوار بەنداوی نوێ لە هەرێمی کوردستان دروستبکرێت."

ئەمڕۆ ناونووسین بۆ فەریزەی حەجی ساڵی 2024 دەستپێدەکات. گوتەبێژی بەڕێوەبەرایەتیی حەج و عومرەی هەرێمی کوردستان دەڵێت، چوون بۆ حەج لە رێگەی نووسینگەکانەوە نایاساییە و دەبێت تەنیا لەڕێگەی وەزارەتی ئەوقافەوە بێت

پارێزگاری سلێمانی داوای لە مامۆستایانی ناڕازی کرد بگەڕێنەوە بۆ ناوەندەکانی خوێندن. دەشڵێت، "نابێت مووچە و شایستەکانی مامۆستایانی سلێمانی تێکەڵ بە بەرژەوەندیی حیزبی و کەسی بکرێن."

حیزبی شیوعیی کوردستان سەرکۆنەی بۆردوومانەکەی فڕۆکەخانەی عەربەت دەکات و داوا دەکات، "بە زووترین کات" بکەرانی ئەو هێرشە ئاشکرا بکرێن. هاوکات، لەبارەی کوژرانی ئەندامێکی کۆنگرەی نەتەوەیی کورد لە هەولێر داوا لە هێزە ئەمنییەکان دەکات، "پەلە بکەن لە دۆزینەوەی تاوانبار و بەسزا گەیاندنیان."

#SUMMARY#