جێگری بەڕێوەبەری گشتیی تەندروستیی سلێمانی دەڵێت، لە چەندین بواری جیاوازدا کێشەیان هەیە و بەهۆی کەمیی دەرمانەوە نزیکەی 30%ی دەرمانی نەخۆشییە درێژخایەنەکان بۆ نەخۆش دابین دەکرێن، نزیکەی 25 بۆ 30 ملیار دیناری کۆمپانیاکانی دەرمانیش قەرزدارن، پێداویستییەکانی بانکی خوێنیش لەلایەن خێرخوازەوە دابین دەکرێت
بەڕێوەبەری خانەنشینیی پێشمەرگە لە سلێمانی دەڵێت، بە جێبەجێکردنی هاوتاکردنی خانەنشینیی سەربازی لەگەڵ عێراقدا، مووچەی خانەنشینییان کەم دەکات، بەڵام بڕیاردراوە بۆ مانگی شوبات مووچەکانیان وەکو خۆی لێبکرێتەوە و هاوتاکردنی مووچەکانیان رابگیرێت
بەڕێوەبەری سامانی ئاژەڵی سلێمانی رایگەیاند، رێگری لە هەناردەکردنی بەرهەمی مریشک، هێلکە و ماسی بۆ شارەکانی ناوەڕاست و خواری عێراق دەکرێت. لیژنەیەکی وەزارەتی کشتوکاڵیش لێکۆڵینەوە لە هۆکارەکەی دەکات
ئەمڕۆ پەرلەمانی عێراق کۆدەبێتەوە و بەگوێرەی کارنامەی کۆبوونەوەکە، پرسی پەسندکردنی یاسای گەڕاندنەوەی موڵک تاوتوێ دەکرێت، نوێنەرێکی جووتیارانی سەرگەڕان دەڵێت، "پەسندکردنی یاساکە هەنگاوێکی گرنگە بۆ گەڕاندنەوەی موڵکی جووتیارانی کورد و تورکمان."
بە گوتەی پۆڵا سیروان تاڵەبانی، ئەوان دەیانەوێت شەریک بن لە بڕیاردان و بەڕێوەبردنی حکومەت، "نابێت بە قسە شەریک بین و لە بڕیاردان و بەڕێوەبردندا رۆڵمان نەبێت."
بەڕێوەبەری هاتووچۆی سلێمانی دەڵێت، لیژنەی ئەمنیی سلێمانی بڕیاریداوە دەست بەسەر ئۆتۆمبێلی بێ سەرەتادا بگیرێت و بڕیارەکەش بەردەوام دەبێت، تاوەکو ئێستاش نزیکەی 100 ئۆتۆمبێلی جۆراوجۆر دەستیان بەسەرداگیراوە.
ئەمڕۆ سوودانی لەگەڵ ئەمینداری گشتیی یەکگرتووی ئیسلامیی کوردستان کۆدەبێتەوە، یەکێک لەو پرسانەی تاوتوێ دەکرێن، پرسی پێکهێنانی کابینەی نوێی حکومەتی هەرێمی کوردستانە؛ کارگێری ئەنجوومەنی جێبەجێکردنی یەکگرتوو جەخت لەوە دەکاتەوە، لە بڕیاری ئۆپۆزیسیۆنبوون پاشگەز نابنەوە، چونکە بڕیارەکە لە ئەنجوومەنی جێبەجێکردن و ئەنجوومەنی سەرکردایەتی گفتوگۆی لەبارەوە کراوە
گوتەبێژی یەکێتیی نیشتمانیی کوردستان رایگەیاند، هیچ کابینەیەکی حکومەت بەبێ پارتی و یەکێتی پێکناهێندرێت، حیزبەکەشی ئۆپۆزیسیۆن نییە و ناڕەزایەتییەکان بۆ ئەوە نەبووە حکومەت پێکنەهێندرێت
یاریدەدەری سەرۆکی ژووری ئۆپەراسیۆنی سەرژمێری لە هەرێمی کوردستان رایگەیاند، رۆژانی 16 بۆ 20ی ئەم مانگە سەرژمێریی راستەقینە لە هەرێمی کوردستان ئەنجامدەدرێت، پێویستە دانیشتووانی کەرکووک بۆ ئەو رۆژانە بگەڕێنەوە ناوچەکانیان، رۆژانی 20 و 21یش تەنها پێداچوونەوە بە داتا و زانیارییەکان دەکرێت
بەڕێوەبەری نەخۆشخانەی هیوا لە سلێمانی رایگەیاند، ئەم ساڵ نزیکەی سێ هەزار تووشبووی نوێی شێرپەنجە لە نەخۆشخانەکەیان تۆمارکراون، رۆژانەش 700 بۆ 800 چارەخواز سەردانی کردوون.
لە خانەقین بەربژێرێکی یەکێتیی نیشتمانیی کوردستان بۆ ئەنجوومەنی پارێزگەی دیالە دەرچوو، کە لە نەتەوەی عەرەبە و دەڵێت، 90٪ی ئەو دەنگانەی بەدەستیهێناوە، دەنگی کوردانی خانەقینە و بەرگری لە دەنگدەرانی دەکات.
گوتەبێژی بەڕێوەبەرایەتیی پەروەردەی گەرمیان رایگەیاند، بەهۆی دەستپێنەکردنەوەی خوێندن و داواکاریی ئەو کەسانەوە کە فرۆشگەکانی قوتابخانەکانیان بە کرێ گرتبوو، پارەی ئەمساڵی بەکرێگرتنی قوتابخانەکانیان بۆ گەڕاندوونەتەوە
نەقیبی سەندیکای مامۆستایانی عێراق رایگەیاند، پشتگیریی داواکاریی مامۆستایانی ناڕازیی هەرێمی کوردستان دەکەن بۆ دابەشکردنی مووچەکانیان، گوتیشی نابێت کێشەکانی مامۆستایان کاریگەرییان لەسەر پرۆسەی خوێندن هەبێت.
قایمقامی هەڵەبجە رایگەیاند، بەهۆی قەیرانی داراییەوە پلانی بە پارێزگابوون و گەشەکردنی شارەکە بە تەواوی جێبەجێ نەکراوە. دەشڵێت، رێژەی بێکاری لە هەڵەبجە بەراورد بە شارەکانی دیکەی هەرێمی کوردستان زیاترە.
ئەمڕۆش لە مەڵبەندی 10ی سەنتەری شاری سلێمانی و قەزاکانی رانیە، دووکان، چەمچەماڵ و هەڵەبجەی تازە، نەوت دابەش دەکرێت.
وەزارەتی شەهیدان و ئەنفالکراوان لە سنووری چەمچەماڵ و کەلار، ناوی ئەو کەسانە تۆمار دەکات کە خۆیان بە کەسوکاری ئەو 171 رووفاتە دەزانن، کە لە گۆڕێکی بەکۆمەڵی سەماوە دۆزرانەوە و ئێستا لە دادپزیشکی بەغدان، بۆ ئەوەی لە رێگەی پشکنینی DNAیەوە رووفاتەکان بناسرێنەوە و بگەڕێندرێنەوە هەرێمی کوردستان.
سەرۆکی لیژنەی ناوەندی تاپۆکردنی خانووە زێدەڕۆکانی سلێمانی رایگەیاند، لە ماوەی چوار مانگی داهاتوودا هەوڵدەدەن پرۆسەی تاپۆکردنی خانووە زێدەڕۆکان لە سەنتەری شارەکان تەواو بکەن و قۆناخی تاپۆکردنی خانووە زێدەڕۆکانی دەرەوەی شارەکان دەستپێبکەن. دەشڵێت، ئێستا هیچ داواکارییەکی نوێ بۆ تاپۆکردنی خانووی زێدەڕۆ وەرناگرن
