Hewlêr (Rûdaw) - Ji aliyê jûriyê Manhattanê ve der barê Serokê berê yê Amerîka Donald J. Trump de lêpirsîn hat destpêkirin.
Bi vê biryarê, Donald Trump dê bibe yekem serokê berê yê Amerîkî di dîroka Amerîka de ku ji ber sûcdarkirina wî tê dadgehkirin.
Parêzerê Trump, Joe Tacopina ragihand ku Juriya Mezin a New Yorkê di çarçoveya lêpirsîna li ser dayîna 130 hezar dolarî wek “para hişbûnê” bo stêra pornoyê Stormy Daniels ku tê îdiakirin derveyî zewacê sex kirine ji bo ku Trump tawanbar bikin deng hatiye dayîn.
Bi vî rengî, Trump dê bibe yekem serokê berê yê Dewletên Yekbûyî di dîroka Amerîkayê de ku ji bo sûcdarkirina wî derdikeve pêşberî dadgehê.
Trumpê ku ji bo hilbijartinên serokatiy yên 2024an li DYAyê berbijêr e, di 18ê Adarê da ragihandibû ku ew li bendê ne ku di çarçoveya lêpirsîna wî de ya li Serdozgerê Manhattanê were girtin û ji ber vê jî banga protestoyê kiribû.
“Para hişbûnê”
Stêrka pornoyê Stormy Daniels îdia kir ku wê di sala 2016an de peymanek îmze kiriye da ku 130 hezar dolar ji bo wê bê dayîn da ku li ser têkiliya xwe ya zayendî ya bi Trump re bêdeng bimîne, lê îdia kir ku ew nederbasdar e ji ber ku ji hêla Trump ve nehatiye îmzekirin.
Dema ku Trump îdiayên Daniels red kir, Michael Cohen, ku berî kampanyaya hilbijartinê ya 2016-an parêzerê Trump bû, piştrast kir ku wî li ser navê Trump 130 hezar dolar ji hesabê xwe daye Daniels.
Cohen îdia kir ku kompaniyên Trump paşê bi qasî 420 hezar dolar bonus dane Daniels.
Cohen ku di berfanbara 2018an da di çarçoveya lêpirsîna kampanyaya hilbijartinê ya Trump da bi îdiaya "derew gotin" û "bac revandin" hat binçavkirin, li dadgehê 3 sal cezayê girtîgehê lê hat birîn û di Gulana 2019an da ji bo cezakirina wî şandin girtîgeha federal a Otisvilleyê.
Di wan salan de, dozgerên federal hewce nedîtin ku lêpirsînek li ser Trump bidin destpêkirin, lê Dozgeriya Herêma Manhattanê lêpirsîna ku wek “Para hişbûnê” dabû destpêkirin.
Tawanbariyê wek "siyasî" bi nav kir
Ji aliyê din ve Donald Trump sûcdariya ku ji aliyê Juriya Mezin a New Yorkê ve li dijî wî hatiye kirin weke "siyasî" bi nav kir û destnîşan kir ku ev sûc "destwerdana li hilbijartinan e".
Trump di çarçoveya lêpirsîna 130 hezar dolarê "para hişbûnê" ya ji bo stêrka pornoyê Stormy Daniels a ku tê îdiakirin ku ji derveyî zewacê seksê kiriye, der barê wî de îdianameya Dadgeha New Yorkê ya Mezin daxuyaniyeke nivîskî weşand.
Trump got “Ev di dîrokê de asta herî bilind a çewisandina siyasî û destwerdana hilbijartinê ye.” herwiha Trump îdia kir ku "Demokratên çep ên radîkal di nêçîra pîrebokan de ne ku tevgera `Amerîka Ji nû ve Mezin bikin` hilweşînin.
Trûmp lêpirsînên li dijî wî yên weke lêpirsîna Rûsyayê ya li dijî wî û serdegirtina FBI'yê ya li qesra wî Mar-a-Lago bibîr xist û got “Demokratan ji bo 'Trûmp bi dest bixin' de derewan kirin, hîleyan kirin û dizî kirin. Lê niha wan tişta ku nayê fikirîn kirin.”
“Destwerdana hilbijartinan”
Trump da zanîn ku ev kiryara Demokratan destwerdana hilbijartinan e û destnîşan kir ku ew bi tevahî bêguneh e.
Trump diyar kir ku di dîroka welêt da bûyereke wiha çênebûye û îdia kir ku li welêt pergala edaletê milîtarîze bûye. Trump ku bi fermî ji Partiya Komarparêz namzedê hilbijartinên 2024an e, diyar kir ku Demokrat dixwazin dijberên xwe yên siyasî ji ber ku di rapirsiyan de li pêş xuya dike ceza bikin.
Serokê berê yê Amerîkayê Trûmp heriwha got “Parêzerê Manhattan Alvin Bragg, ku bi baldarî ji hêla George Soros ve hatî hilbijartin û fînanse kirin, rezalet e. Li şûna rawestandina pêla sûcê nedîtî ya ku li New York City digire, ew karê Joe Biden qirêj dike bi paşguhkirina kuştin, dizî û êrişên ku diviyabû li ser bisekine.”
Trump dibêje “Ez bawer dikim ku ev nêçîra pîreboka dê bi giranî li Joe Biden vegere.” Trump amaje bi wê yekê kir ku ligel alîgirên xwe ew ê vê yekê bi ser bixin, Biden têk bibin, Demokratan ji kar derxînin û Amerîka dîsa mezin bikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse