Hewlêr (Rûdaw) - Di hilbijartinên Parlamentoya Awisturyayê de li gorî encamên destpêkê yên ne fermî partiya rastgir a tundrew Partiya Azadiyê ya Awisturyayê (FPO) bi rêjeya ji sedî 28,80 li pêş e.
Her wiha Partiya Gel a Awisturyayê (OVP) jî bi rêjeya ji sedî 26,30 di rêza duyem de ye.
Xelkê Awisturyayê ji bo hilbijartina 183 parlamenteran îro çû ser sindoqan.
Li gorî televîzyona dewletê ya Awisturyayê ORFyê, rêjeya beşdariya hilbijartinan ji sedî 78,1 e.
Wekî ku di rapirsiyan de jî derketibû, Partiya Azadiyê ya Awisturyayê (FPO) ya bi serokatiya Herbert Kickl niha bi rêjeya 28,80 di rêza yekem de ye.
Ji sala 1945an ve cara yekem
FPO ji sala 1945an û vir ve cara yekem di hilbijartinên parlamentoyê de bi eşkere di rêza yekem de cih digire.
Li aliyê din Partiya Gel a Awisturyayê (OVP) a desthilat a bi serokatiya Karl Nehammer bi rêjeya ji sedî 26,30 daketiye rêze duyem.
Di rêza sêyem de jî bi rêjeya ji sedî 20 Partiya Sosyal Demokrat a Awisturyayê (SPO) heye.
Li gorî encamên destpêkê rêjeya dengên partiyan wiha ye:
Partiya Azadiyê ya Awisturyayê (FPO): Ji sedî 28,80 - 57 parlamenter
Partiya Gel a Awisturyayê (OVP): Ji sedî 26,30 - 51 parlamenter
Partiya Sosyal Demokrat a Awisturyayê (SPO): ji sedî 21 - 41 parlamenter
Awisturyaya Nû û Foruma Lîberal (NEOS): Ji sedî 9,10 - 18 parlamenter
Partiya Keskan (Die Grunen): Ji sedî 8,30 - 16 parlamenter
Partiya Komunîst a Awisturyayê (KPO): Ji sedî 2,40 - 0 parlamenter
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse