Serokê Amerîkayê pîrozbahî li Erdogan kir
Hewlêr (Rûdaw) - Serokê Amerîkayê Joe Biden di peyamekê de hilbijartina Recep Tayyip Erdogan wek Serokkomarê Tirkiyê pîroz kir.
Ji ber ku di gera yekem a hilbijartinan de ku roja 14ê Gulanê hat lidarxistin, ti berbijêrekî nekarî piraniya 50+1 a dengan misoger bike, roja 28ê Gulanê gera duyem a hilbijartina serokkomariyê li Tirkiyê hat lidarxistin.
Li gor daxuyaniya Serokê Komîsyona Bilind a Hilbijartinên Tirkiyê (YSK) Ahmet Yener, berbijêrê Hevpeymaniya Cumhur Recep Tayyip Erdogan serkeftin misoger kiriye û careke din wek Serokkomarê Tirkiyê hatiye hilbijartin.
Li gor encamên destpêkê yên ku YSKê ragihandine, di gera duyem a hilbijartinê de Erdogan ji sedî 52,14ê dengan û Kiliçdaroglu jî ji sedî 47,86 dengan wergirtine.
Ji ber serkeftina Erdogan di hilbijartina serokomariyê de, lîderên cîhanê peyamên pîrozbahiyê arasteyî wî dikin.
Serokê Amerîkayê Joe Biden jî di peyamekê de serkeftina di hilbijartinan de li Erdogan pîroz kir.
Joe Biden di peyama xwe de wiha dibêje: “Dubare hilbijartina Serokomarê Tirkiyeyê Recep Tayyip Erdogan pîroz dikim. Ez li bendê me ku wekî Hevalbendên NATOyê li ser mijarên dualî û pirsgirêkên hevpar ên gerdûnî bi hev re bixebitin.”
Congratulations to President Recep Tayyip Erdogan of Türkiye on his re-election.
— President Biden (@POTUS) May 28, 2023
I look forward to continuing to work together as NATO Allies on bilateral issues and shared global challenges.