Sekreterê Giştî yê Komeleya Çandê ya Kurdan a Japonyayê Vakkas Çolak bû mêvanê Nalîn Hesenê /Wêne: Rûdaw
Hewlêr (Rûdaw) - Li Japonyayê xwepêşandan li dijî Kurdan hat kirin û xwepêşander daxwaza derxistina biyaniyan ji welatê xwe dikin.
Sekreterê Giştî yê Komeleya Çandê ya Kurdan a Japonyayê Vakkas Çolak bû mêvanê bultena Nûrojê ya Rûdawê li ser xwepêşandanên komên nijadperest ên Japon ên li dijî Kurdan û biyaniyên din ên li Japonyayê bersiva pirsên Nalîn Hesenê da.
Vakkas Çolak diyar kir kesên ku xwepêşandanê dikin du grup in ku hejmara wan di navbera 3 heta 10 kesan de ye û nijadperestên Japonyayê ne ku ser bi partiya Yekemîn Japonya e û Partiya Parêzgaran a Japonyayê ne.
Her wiha Vakkas Çolak ragihand ku ev grûpên ku xwepêşandanê dikin li dijî hebûna xelkên biyanî yên wekî Koreyî û Çînî ne û derdora salekê ye li dijî hebûna Kurdan jî derdikevin.
"MÎTa Tirkiyeyê piştgiriya nijadperestan dike"
Derbarê sedema derketina wan a li dijî hebûna Kurdan Vakkas Çolak eşkere kir ku ev derdora salekê ye ku ev nijadperest li dijî hebûna Kurdan derdikevin û sedema jî wekî "Dewleta Japonyayê dibêje MÎTa Tikiryeyê û Balyozxaneya Tirkiyeyê ya Japonyayê li pişt van nejadperestan e."
"Li Japonyayê 2 hezar 500 Kurd hene"
Li ser hejmara Kurdan û rewşa wan li Japonyayê Çolak da zanîn ku 2 hezar 500 Kurd li Japonyayê dijîn ku 2 hezar ji wan li bajarê Saitamayê û 500 kesên din li Tokyo û derdora wê dijîn.
Sekreterê Giştî yê Komeleya Çandê ya Kurdan a Japonyayê Vakkas Çolak:
— RudawKurdi (@RudawKurdi) November 24, 2024
🎙️ ❝Tirkiye li pişt dijberiya Japonan a li dijî Kurdan e❞
🎙️ ❝Li Japonyayê 2 hezar û 500 #Kurd dijîn❞
🎙️ ❝Gef li malbat û zarokan hatin xwarin❞#Japan #Kurdistan #日本 pic.twitter.com/FttnyFYRXH
"Nijadperest ji bajarên din tên"
Her wiha Çolak tekez kir ku ev 30 sal in Kurd li Japonyayê ne û ti pirsgirêka wan li gel xelkê wan bajaran ku lê dijîn nîne lê ev nejadperest ji bajarên din ên wekî Kanagawayê tên û xwepêşand dikin.
200 kompanyayên Kurdan hene
Vakkas Çolak amaje bi wê yekê kir ku derdora 200 kompaniyên biçûk yên Kurdan li Japonyayê hene û di ware avahîsaziyê û akadimîk de kar dikin.
Her wiha 400 zarok û ciwanên Kurd li dibistan û zanîngehên Japonyayê dixwînin û di van demên dawî de gef li xwendekaran jî tê xwarin ku vegerin welatê xwe.
Li 10 kesan doz hatiye vekirin
Derbarê tedbîrên hikûmetê ji bo parastina Kurdan ên li Japonyayê Çolak got ku wan li dadgehê li 10 kesan doz vekiriye û ew li benda biryara dadgehê ne û pêşbînî dikin ku heta Adara 2025an dadgeh li ser dozê biryara dawî bide.
Çolak da zanîn, ji ber ku gefa kuştinê li Kurdan xwaribû û ji wan re gotibû "Ez dê goştê we bidim berazan" kesek hatiye girtin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse