Rûdaw
Mumbai (Rûdaw) – Li muzexaneyeke welatê Hindistanê peykerê Mele Mistefa Barzanî hate danîn. Peyker ji aliyê peykersazê navdar ê Hindistanê Sunil û bi alîkariya xwendekarekî Kurd ê bi navê Ehmed Celal ve hatiye danîn. Li muzexaneya Wax Museum ku li bajarê Lunavla yê nêzîkî Mumbai ye, peykerên 84 serkirde û kesên navdar ên cîhanê hatine danîn.
Wax Museum bûye 8 sal e vekirî ye û muzexaneyeke peykerên kesayetên navdar ên cîhanê ye, ku têde 84 peyker hene û peykerê serkirdeyê Kurd Mele Mistefa Barzanî jî hatiye danîn. Rêvebera wê muzexaneyê diyar dike ku xwendekarekî Kurd pêşniyara danîna peykerê Barzaniyê Nemir kiriye.
Rêvebera Muzexaneya Weks, Cristy Eliyas: “Di sala 2008an de ev muzexane hate çêkirin. Heta niha peykerên 84 kesayet û serkirde û kesên navdar ên cîhanê têde hatine danîn, fikra danîna peykerê Mele Mistefa Barzanî jî fikra xwendekarê Kurd Ehmed Celal bû, ku wê demê xwendekarê doktorayê bû û serdana vê derê kir û piştre peykerê Mele Mistefa Barzanî hat danîn.”
Di sala 2014an de dest bi çêkirina peykerê Barzanî hat kirin û di meha Adara 2016an de di merasîmekê de bi fermî peykerê Mele Mistefa Barzanî li muzexaneyê hat danîn.
Xwediyê fikra danîna peykerê Mele Mistefa Barzanî, Dr. Ehmed Celal diyar kir: “Di sala 2014an de me serdana muzexaneyê kir, min dît peykerên gelek kesayetên navdar ên cîhanê têde ne, min zanyarî li ser Mele Mistefa Barzanî dan Sunil û wî jî giringî da û dest bi çêkirina peyker kir.”
Rojane di navbera hezar û du hezar geştiyar ji welatên cur bi cur têne Wax Museum daku peykerên kesayetên navdar bibînin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse